تۇركىستان وبلىسىندا كۇدىكتىلەردى ازاپتاعان 6 پوليتسەيگە ۇكىم شىقتى
وقيعا وتكەن جىلى ساۋران اۋدانىندا بولعان. اۋداندىق پوليتسيا ءبولىمىنىڭ 6 قىزمەتكەرى ەكى كۇدىكتىنى پوليتسيا بولىمىندە زاڭسىز ۇستاعان. مال ۇرلىعىنا بايلانىستى قىلمىستىق قۇقىق بۇزۋشىلىقتاردى جاساعاندىعىن مويىنداتۋ، ايعاقتاردى الۋ، قىلمىستى اشۋ بويىنشا كورسەتكىشتى جاساندى تۇردە كوتەرۋ ماقساتىندا كۇدىكتىلەردى قورقىتىپ، ءتىپتى فيزيكالىق كۇش قولدانعان.
سوت وتىرىستارىندا كۇدىكتىلەر جابىرلەنۋشىلەر رەتىندە جاۋاپ بەردى.
پروكۋرور پوليتسەيلەردى كىنالى دەپ تانىپ، ءارقايسىسىنا 5 جىل 6 اي مەرزىمگە باس بوستاندىعىنان ايىرۋ تۇرىندە تۇپكىلىكتى جازا تاعايىنداۋدى سۇرادى.
ال جابىرلەنۋشىلەر سوتتالۋشىنىڭ بىرەۋىنە كەشىرىم بەرەتىندىگىن ايتتى. قالعان سوتتالۋشىلارعا پروكۋرور سۇراعان جازانى تاعايىنداۋدى ءوتىندى.
سوت ۇكىمىمەن 6 سوتتالۋشى قىلمىستىق كودەكسىنىڭ 146-بابى 2-بولىگىنىڭ 1) ، 2) تارماقتارىندا جانە 414-بابىنىڭ 1-بولىگىندە كوزدەلگەن قىلمىستىق قۇقىق بۇزۋشىلىقتاردى جاساعانى ءۇشىن كىنالى دەپ تانىلدى.
ءتورت سوتتالۋشىعا 4 جىل مەرزىمگە، ەكى سوتتالۋشىعا 3 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. سونداي- اق بارلىعى ارناۋلى اتاقتارىنان جانە 3 جىلعا دەيىن قۇقىق قورعاۋ ورگاندارىندا قىزمەتپەن اينالىسۋ قۇقىعىنان ايرىلدى.
«سوت جازا تاعايىنداۋ كەزىندە جەڭىلدەتەتىن ءمان- جايلاردى - جابىرلەنۋشىلەردىڭ سوتتالۋشىعا كەشىرىم بەرگەنىن، ەكى سوتتالۋشىنىڭ قىلمىس جاساۋ كەزىندە بەلسەندى ءرول اتقارماعانىن جانە بارلىق ايىپتالۋشىلاردىڭ بۇعان دەيىن ءىستى بولماعانىن نەگىزگە الدى. ال اۋىرلاتاتىن ءمان- جايعا - بەرگەن انتتى بۇزعانى جاتقىزىلدى.
جازانى قىلمىستىق- اتقارۋ جۇيەسىنىڭ ورتاشا قاۋىپسىز مەكەمەلەرىندە وتەۋ تاعايىندالدى. سوت ۇكىمى زاڭدى كۇشىنە ەنگەن جوق»، - دەلىنگەن تۇركىستان وبلىستىق سوتىنىڭ باسپا ءسوز قىزمەتى ۇسىنعان حابارلامادا.
ەسكە سالايىق، 2022 -جىلدىڭ تامىز ايىندا الەۋمەتتىك جەلىدە پوليتسيا باسقارماسىندا ازاپتالعان ەر ادامنىڭ داۋىسى جازىلعان ۆيدەو جاريالانعان ەدى. تەكسەرۋ كەزىندە بۇل ۆيدەونىڭ ساۋران اۋداندىق پوليتسيا بولىمىندە تۇسىرىلگەنى انىقتالدى. ياعني قوي ۇرلاعانى ءۇشىن كۇدىكتى رەتىندە ۇستالعان تۇرعان پوليتسەيلەر وزىنە كۇش كورسەتكەنىن ايتقان. ءتىپتى، باسىنا قاپ كيگىزىپ، ۇرىپ- سوققانىن جەتكىزگەن بولاتىن. كەيىننەن كۇدىكتىنىڭ قىلمىسىن كۇشپەن مويىنداتپاق بولعان پوليتسەيلەر قاماۋعا الىندى.
