يۋنەسكونىڭ مادەني مۇرالار تىزىمىنە تاعى 6 نىسان ەنگىزىلەدى - مينيستر
بۇل جايىندا ەلىمىزدىڭ مادەني ساياساتىنىڭ تۇجىرىمداماسىن تانىستىرعان مادەنيەت جانە سپورت ءمينيسترى اسحات ورالوۆ ءمالىم ەتتى، دەپ حابارلايدى قازاقپارات ءتىلشىسى.
«قازىرگى ۋاقىتتا يۋنەسكونىڭ بۇكىلالەمدىك مادەني مۇرا تىزىمىنە قازاقستان رەسپۋبليكاسىنان 10 نىسان ەنگىزىلگەن. 2025-جىلعا قاراي ولاردىڭ سانىن 16 عا دەيىن ارتتىرۋ جوسپاردا بار. قىرعىزستان، تاجىكستان جانە وزبەكستانمەن بىرلەسىپ، «ۇلى جىبەك جولى: فەرعانا - سىرداريا ءدالىزى» سەريالىق ترانسۇلتتىق نوميناتسياسىن دايىنداۋ جانە ىلگەرىلەتۋ بويىنشا جۇمىس جۇرگىزىلىپ كەلەدى. ونىڭ اياسىندا ۇلى جىبەك جولى بويىنداعى 6 نىساندى: سىعاناق، ساۋران، ياسى، وتىرار، جانكەنت قالاشىقتارى مەن جەتىاسار وازيسىنىڭ ەسكەرتكىشتەرىن يۋنەسكو تىزىمىنە ەنگىزۋ جوسپارلانىپ وتىر»، - دەپ جازدى مينيستر Telegram-پاراقشاسىندا.
ونىڭ اتاپ وتۋىنشە، قازاقستاننىڭ مادەني برەندىن دامىتۋ ءۇشىن مادەني تۋريزمدى جولعا قويۋ ماڭىزدى.
«قازىردىڭ وزىندە سارايشىق، ۇلىتاۋ، تاڭبالى جانە وتىرار ۆيزيت-ورتالىقتارىن پايدالانۋعا بەردىك. جاقىن ارادا گاۋحار-انا، ساۋران، ەسىك جانە ورداباسى رەسپۋبليكالىق مۋزەي-قورىقتارىنىڭ اۋماعىندا ۆيزيت-ورتالىقتاردىڭ قۇرىلىسىن اياقتالادى. سونداي-اق، اشىق اسپان استىنداعى «بوزاق» ۇلتتىق ارحەولوگيالىق ساياباعىن قۇرۋ جۇمىستارى جۇرگىزىلىپ جاتىر. وسى كۇندەرى ورتاعاسىرلىق ارحيتەكتۋرالىق ستيلدە كىرەبەرىس قاقپالارى سالىنۋدا»، - دەدى ول.
مينيستر سوڭعى ءۇش جىلدا 8 ارحەولوگيالىق ەسكەرتكىش (بەرەل، بىتىگاي، بوتاي، بوزوك، راحات، سارايشىق جانە ت. ب.) زەرتتەلگەنىن اتاپ وتەدى. ول جۇمىستار بيىل اياقتالماق.
«2030-جىلعا قاراي ءبىز عىلىمي-رەستاۆراتسيالاۋ جۇمىستارى جۇرگىزىلگەن رەسپۋبليكالىق تاريحي جانە مادەنيەت ەسكەرتكىشتەرىنىڭ ۇلەسىن ولاردىڭ جالپى سانىنىڭ 40 پايىزىنا دەيىن جەتكىزۋگە نيەتتىمىز. قازاقستاننىڭ ماتەريالدىق ەمەس مادەني مۇراسىنىڭ ۇلتتىق تىزبەسىن تولىقتىرۋ جۇمىستارى جالعاسادى. 2030-جىلعا قاراي ءبىز يۋنەسكونىڭ ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتى تىزىمىندە ۇسىنىلعان قازاقستان مادەنيەتىنىڭ ەلەمەنتتەرىنىڭ سانىن 20 بىرلىككە دەيىن جەتكىزۋدى جوسپارلاپ وتىرمىز. بۇل - ءبىزدىڭ رۋحاني بايلىعىمىزدى ناسيحاتتاۋ، دامىتۋ جانە ساقتاۋ باعىتىنداعى ماڭىزدى قادام»، - دەدى اسحات ورالوۆ.
