ءبىرقاتار ازىق- تۇلىك 6 اپتا قاتارىنان ارزانداپ كەلەدى

استانا. قازاقپارات - پرەمەر-ءمينيستردىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين ازىق-تۇلىك تاپشىلىعى ورىن الۋى مۇمكىندىگىنە قاتىستى ب ا ق وكىلدەرىنىڭ ساۋالىنا جاۋاپ بەردى، دەپ حابارلايدى قازاقپارات ءتىلشىسى.

«ازىق-تۇلىك قورى جاساقتالدى. ءبىز 140 مىڭ توننا قور جينادىق، قازىر 113 مىڭ توننادان بروندى الىپ تاستادىق. بىزدە ءالى دە قور بار. بۇعان قوسا، تاجىكستاننان جەتكىزىلىم كۇتىپ وتىرمىز. وزبەكستاننان يمپورتتاۋ باستالدى. باعا ءسال عانا جوعارى بولادى. ءبىراق، قازىرگى ۋاقىتتا تاپشىلىق تۋرالى ماسەلە كوتەرۋدىڭ قاجەتى جوق. بەلگىلەگەن جوسپاردى مۇلتىكسىز ورىندايمىز»، - دەدى ول.

ونىڭ اتاپ وتۋىنشە، بۇگىندە ەلىمىزدە كارتوپ، ءسابىز، قىرىققابات جانە پيازدىڭ جەتكىلىكتى قورى بار.

«وزدەرىڭىز دە بىلەتىندەي، كاسىپكەرلەر پيازدىڭ قانداي دا ءبىر بولىگىن ەكسپورتقا شىعارۋى ءۇشىن 20 مىڭ تونناعا رۇقسات بەردىك. ءقازىردىڭ وزىندە پيازدىڭ جاڭا ءونىمى ەگىلىپ جاتىر. سونىمەن قاتار قانتتىڭ جەتكىلىكتى كولەمى بار، كۇرىش ەگىپ جاتىرمىز. مىنە، التىنشى اپتا قاتارىنان ازىق-تۇلىكتىڭ 6 ءتۇرى ارزانداپ كەلەدى: ولار - قاراقۇمىق، كۇنباعىس مايى، قانت، تاۋىق ەتى. وتكەن اپتادا كارتوپ پەن ءسابىز ارزانداي باستادى. قازىر تۇراقتاندىرۋ قورلارىنان بۇل ازىق-تۇلىك تۇرلەرىن نارىقتىق باعادان تومەن مول كولەمدە بروننان شىعاردىق. ولاردى 610 ساۋدا نۇكتەسىندە ساتا باستادىق. بۇگىندە مۇنداي نۇكتەلەردىڭ سانى قازاقستان بويىنشا 1040 قا جەتتى»، - دەدى سەرىك جۇمانعارين.