ايداربەك قوجانازاروۆ: ۇكىمەتكە ەكىنشى مۇمكىندىك بەرەمىز – 6 اي
ونىڭ اتاپ وتۋىنشە، قازىرگى ۇكىمەتكە مۇمكىندىك بەرىپ، الدىنا قويىلعان مىندەتتى قالاي جۇزەگە اسىراتىنىن قاراۋ كەرەك. سونىمەن قاتار، ول ۆەدومستۆولاردىڭ تارتىنشاقتىعىن سىناپ ءوتتى.
«ءبىزدىڭ مينيسترلىكتەر قانداي دا ءبىر تۇزەتۋلەر ەنگىزۋ ءۇشىن پرەزيدەنتتىڭ جولداۋىنا سول تۇزەتۋلەردى ەنگىزۋگە تىرىسادى. سودان كەيىن عانا ناقتى ءىس-قيمىل باستالادى»، - دەدى ول ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا وراي.
سونىمەن قاتار، پارتيا كوشباسشىسى ۇكىمەت باسشىسى لاۋازىمىنا ءوز كانديداتتارىن ۇسىنۋعا قاتىستى ساۋالعا جاۋاپ بەردى.
«ءبىز ەكى ايدىڭ ىشىندە ۇكىمەتتىڭ الدىنا قويىلعان سىن-تەگەۋىرىندەرگە جاۋاپ بەرە الارلىقتاي كادرلىق رەزەرۆ جاساقتايتىن جاعدايدا ەمەسپىز. ۇكىمەتكە ەكىنشى مۇمكىندىك بەرەمىز – 6 اي. ەگەر، ۇكىمەت سول باياعى ءتيىمسىز ءارى يكەمسىز بولىپ قالا بەرگەنىن كورسەك، وندا ءوزىمىزدىڭ كادرلىق رەزەرۆتەن ادامداردى ىلگەرىلەتەتىن بولامىز»، - دەپ اتاپ ءوتتى ايداربەك قوجانازاروۆ.
