سىزگە مىنا 6 جاعدايدا يپوتەكا بەرىلمەيدى: ءبىلىپ الىڭىز

Massaget.kz ءتىلشىسى يپوتەكالىق نەسيەلەندىرۋمەن اينالىساتىن مامان لاۋرا جولشىبايەۆادان بانكتىڭ يپوتەكا بەرۋ كەزىندە نەگە نازار اۋداراتىنىن جانە قانداي جاعدايلاردا يپوتەكا بەرمەيتىنىن سۇرادى.

ساراپشىنىڭ ايتۋىنشا، بانك ءبىرىنشى كەزەكتە ءوتىنىش بەرۋشىنىڭ نەسيە تاريحى مەن جالاقىسىن تەكسەرەدى. كەيىن كليەنتكە قاتىستى وزگە دەرەكتەر تەكسەرىستەن وتەدى.

ناشار نەسيە تاريحى

جولشىبايەۆانىڭ ايتۋىنشا، بانك يپوتەكا راسىمدەۋدەن باس تارتاتىن جانە ءجيى كەزدەسەتىن سەبەپتەردىڭ ءبىرى - ناشار نەسيە تاريحى.

«ارينە، بانك قارىزىن وتەي الماعان ادامعا تاعى قارىز بەرمەيدى. اسىرەسە، يپوتەكا. سونداي-اق، بۇل رەتتە بانك ءسىزدىڭ نەسيە تاريحىڭىز نەلىكتەن ناشار بولعانىن سۇراپ، انىقتامايدى. تاعى ايتا كەتەتىن جايت، يپوتەكانى ەرلى-زايىپتىنىڭ ءبىرى الاتىن بولسا، ولاردىڭ ەكەۋىنىڭ دە نەسيە تاريحى مۇقيات زەرتتەلەدى. كوميسسيا ەكەۋىنىڭ دە نەسيە تاريحىن، تولەم قابىلەتىن تەكسەرەدى. ءبىرىنىڭ نەسيە تاريحى ناشار بولسا، بانك قارىز بەرۋدەن باس تارتادى»، - دەيدى لاۋرا جولشىبايەۆا.

جۇمىس ىستەۋ مەرزىمى جەتكىلىكسىز بولۋى

بانك يپوتەكا بەرۋدەن باس تارتۋى مۇمكىن تاعى ءبىر سەبەپ - ءوتىنىش بەرۋشىنىڭ جۇمىس ىستەۋ مەرزىمى از بولۋى.

«ەكىنشى كەزەكتە بانك قارىز الۋشى ادامنان كەيىنگى 6 ايداعى تابىسى تۋرالى انىقتامانى تالاپ ەتەدى. ياعني جارتى جىل ۋاقىت جۇمىس ىستەپ جاتقانىن دالەلدەيتىن رەسمي قۇجات بەرىلۋى كەرەك»، - دەيدى ساراپشى.

زەينەتاقى اۋدارىمدارىنىڭ بولماۋى

«بانكتىڭ يپوتەكادان باس تارتۋىنىڭ ءۇشىنشى سەبەبى - زەينەتاقى اۋدارىمدارىنىڭ بولماۋى. بۇل ەلىمىزدەگى بانكتەر ءۇشىن قارىز الۋشىنىڭ تۇراقتى تابىسى، جالاقىسى بار ەكەنىنىڭ دالەلى سانالادى. سەبەبى يپوتەكا 1 نەمەسە 2 جىلعا بەرىلمەيدى، كەم دەگەندە 8-10 جىلعا بەرەدى. سوندىقتان دا بانك ءۇشىن تۇراقتى تابىس - ماڭىزدى فاكتور»، - دەيدى جولشىبايەۆا.

باستاپقى جارنانىڭ جەتكىلىكسىز بولۋى

ساراپشى باستاپقى جارنا جەتكىلىكسىز بولسا، بانككە ءوتىنىش بەرىپ، اۋرە بولۋدىڭ قاجەتى جوعىن ايتادى.

«بانك كليەنتتىڭ تولەم قابىلەتى بار ەكەنىنە كەپىلدىك بەرۋى كەرەك. ول ءۇشىن بانككە باستاپقى جارنا تولىق مولشەردە اۋدارىلۋى قاجەت. سوندىقتان باستاپقى جارنانى جيناعان سوڭ عانا بانككە بارعان ءجون»، - دەپ كەڭەس بەرەدى ول.

قارىز الۋشى سوتتى بولعان جاعدايدا

جولشىبايەۆانىڭ ايتۋىنشا، ءوتىنىش بەرۋشىنىڭ سوتتى بولۋى نەسيە تاريحىنىڭ ناشار بولۋىنان دا قيىن جاعداي. مۇنداي جاعدايدا بانك ءوتىنىشتى تىپتەن قاراماۋى دا مۇمكىن ەكەن. زاڭعا قايشى ارەكەتتەر جاساعان ادامعا بانك قانداي ءبىر قارىز بەرۋدەن باس تارتۋعا قۇقى بار. ءتىپتى سالىق تولەمەي، سوت الدىنا بىرنەشە رەت بارعان ادام دا يپوتەكا الا الماۋى مۇمكىن.

وتباسىنىڭ قارىز جۇكتەمەسى ارتۋى

ساراپشىنىڭ سوزىنشە، بىرنەشە كرەديتتىڭ بولۋى دا يپوتەكا بەرىلمەۋدىڭ تاعى ءبىر ءجيى كەزدەسەتىن سەبەبى.

«بىردەن بىرنەشە نەسيە الىپ، ونى تولەپ جۇرگەن ادامعا يپوتەكا بەرۋ بانك ءۇشىن قاۋىپتى كورىنۋى مۇمكىن. ءۇش نەمەسە ودان دا كوپ كرەديتى بار قازاقستاندىقتىڭ ءوتىنىشىن بانك مىندەتتى تۇردە قايتارادى. سول سەبەپتى يپوتەكا الۋدىڭ الدىندا نەسيەلەردى جاپقان دۇرىس»، - دەيدى يپوتەكالىق نەسيەلەندىرۋمەن اينالىساتىن مامان.

يپوتەكاعا ءوتىنىش بەرەر الدىندا نە ءبىلۋ كەرەك؟

ساراپشى يپوتەكا العىسى كەلگەن قازاقستاندىقتارعا ءبىرىنشى كەزەكتە قارىز جۇكتەمەسىن ازايتىپ، نەسيە تاريحىن تەكسەرۋ كەرەگىن ايتادى.

- نەسيە تاريحىن تەكسەرۋ؛

- ءوز اتىڭىزعا جازىلعان كرەديت كارتالارىن تەكسەرۋ؛

- ءوتىنىشتى قاتەسىز، دۇرىس تولتىرۋ؛

- جالاقىنىڭ ناقتى سوماسىن جازۋ (ازايتىپ نەمەسە كوبەيتىپ ەمەس)؛

- جۇمىس ىستەپ تۇرعان جەكە ءنومىردى جازۋ؛

- باسقا مۇلىك، تابىس كوزى بارىن جاسىرماۋ؛

- وتباسى مۇشەلەرىن، بالا سانىن جاسىرماۋ.