رەسپۋبليكا كۇنىنە وراي استاناعا 6 شەتەلدىك تەاتر كەلە جاتىر

بۇل تۋرالى استانا قالالىق مادەنيەت باسقارماسى باسشىسىنىڭ ورىنباسارى نۇران قامزين اكىمدىكتىڭ ونلاين بريفينگىندە ءمالىم ەتتى.

«22-30-قازان ارالىعىندا استانا قالاسىندا تەاتر اپتالىعىن وتكىزۋ جوسپارلانعان. وسىمەن ەكىنشى رەت ەلوردادا شىمىلدىعىن ءتۇرىپ وتىرعان فەستيۆال حالىق قاھارمانى، ك س ر و جانە قازاقستاننىڭ حالىق ءارتىسى، ك س ر و جانە قازاقستان ەملەكمەتتىك سىيلىعىنىڭ يەگەرى، كورنەكتى تەاتر جانە كينو رەجيسەرى ءازىربايجان ءمادي ۇلى مامبەتوۆتىڭ 90 جىلدىق مەرەيتويىنا ارنالعان»، - دەدى باسقارما وكىلى.

سونداي-اق، ول فەستيۆالدە باق سىنايتىن ۇجىمداردىڭ ءتىزىمىن ۇسىندى.

«فەستيۆالگە رەسپۋبليكانىڭ تۇكپىر- تۇكپىرىنەن 8 تەاتر: استانا قالاسىنىڭ جاستار تەاترى، ونەر تەاترى (الماتى)، نارتاي بەكەجانوۆ اتىنداعى قىزىلوردا وبلىستىق مۋزىكالىق دراما تەاترى، عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى (الماتى)، قاليبەك قۋانىشبايەۆ اتىنداعى مەملەكەتتىك اكاەدميالىق قازاق مۋزىكالىق دراما تەاترى (استانا)، اباي اتىنداعى مەملەكەتتىك مۋزىكا تەاترى (سەمەي)، ءىلياس وماروۆ اتىنداعى قوستاناي وبلىستىق قازاق تەاترى، ءازىربايجان مامبەتوۆ اتىنداعى قازاق مەملەكەتتىك دراما جانە كومەديا تەاترى (استانا) قاتىسپاقشى. سونىمەن قاتار بۇل فەستيۆالدە 6 شەتەلدىك تەاتر ونەر كورسەتەدى. بۇل - ماحتۋمكۋلي اتىنداعى تۇركىمەن ۇلتتىق مۋزىكالىق دراما تەاترى، ءابدۋمومىنوۆ اتىنداعى قىرعىز مەملەكەتتىك اكادەميالىق دراما تەاترى، گەيدار اليەۆ اتىنداعى تبليسي مەملەكەتتىك مەملەكەتتىك ازەربايجان تەاترى، وزبەك مەملەكەتتىك جيزاق دراما تەاترى، سانكت- پەتەربۋرگ كامەرالىق تەاترى»، - دەيدى نۇران قامزين.

فەستيۆالدىڭ اشىلۋى 22-قازان كۇنى ساعات 19.30-دا ازەربايجان مامبەتوۆ اتىنداعى قازاق مەملەكەتتىك دراما جانە كومەديا تەاترىندا وتەدى.

«اپتالىقتىڭ سالتاناتتى اشىلۋىندا قاليبەك قۋانىشبايەۆ اتىنداعى قازاق اكادەميالىق مۋزىكالىق دراما تەاترىنىڭ «عاسىردان دا ۇزاق كۇن» سپەكتاكلى ۇسىنىلادى. اپتالىق كەزىندە ءازىربايجان مامبەتوۆ رەجيسەرلىك ەتكەن سپەكتاكلدەر قويىلادى. جابىلۋ سالتاناتى دا وسى تەاتردا 30-قازانعا جوسپارلانعان. فەستيۆالدىڭ وتەتىن ورىندارى - ءازىربايجان مامبەتوۆ اتىنداعى قازاق مەملەكەتتىك دراما جانە كومەديا تەاترى، قاليبەك قۋانىشبايەۆ اتىنداعى قازاق اكادەميالىق مۋزىكالىق دراما تەاترى جانە مۋزىكالىق جاس كورەرمەن تەاترى»، - دەدى اكىمدىك وكىلى.