جاستار ساياساتىنىڭ ماڭىزدى باعىتتارىندا 6 كوميتەت قۇرىلدى
بۇل تۋرالى ق ر مەملەكەتتىك حاتشىسى ەرلان قارين ءمالىم ەتتى، دەپ حابارلايدى قازاقپارات ءتىلشىسى.
«جاستار ساياساتى جونىندەگى كەڭەستىڭ ەلوردالىق مۇشەلەرىمەن كەزدەستىم. سونداي-اق، zoom ارقىلى شەتەلدە تۇرىپ جاتقان ارىپتەستەرمەن اڭگىمەلەسىپ، وزەكتى ماسەلەلەردى تالقىلادىق. كەڭەستىڭ جاڭا قۇرامى جۋىردا جاساقتالعانىنا قاراماستان، ءبىراز جۇمىسقا كىرىسىپ كەتتىك. جۇمىستى ءتيىمدى ۇيىمداستىرۋ ءۇشىن ءبىز جاستار ساياساتى سالاسىنىڭ ماڭىزدى باعىتتارى بويىنشا 6 كوميتەت قۇردىق. اتاپ ايتقاندا، ءبىلىم بەرۋ جانە عىلىم، مەديا، كرەاتيۆتىلىك جانە ونەر، ەكولوگيا، مۇمكىندىگى شەكتەۋلى جاستار، گەندەر ماسەلەلەرى، تۇرعىن ءۇي، جۇمىسپەن قامتۋ تاعى باسقا»، - دەپ جازدى ەرلان قارين الەۋمەتتىك جەلىدەگى پاراقشاسىندا.
مەملەكەتتىك حاتشىنىڭ ايتۋىنشا، ءساۋىر- ماۋسىم ايلارىندا اتالعان كوميتەت مۇشەلەرى مەملەكەتتىك ورگان باسشىلارىمەن كەزدەسۋ وتكىزۋدى جوسپارلاپ وتىر.
«كەڭەس مۇشەلەرى زاڭ شىعارۋ جۇمىسىنا اتسالىسا باستادى. كەڭەستىڭ 15 مۇشەسى «مەملەكەتتىك جاستار ساياساتى تۋرالى» زاڭ جوباسى بويىنشا قۇرىلعان جۇمىس توبىنىڭ قۇرامىنا كىردى. سونداي-اق، كەڭەس مۇشەلەرى ۆولونتەرلىك قىزمەت، قايىرىمدىلىق، ۇكىمەتتىك ەمەس ۇيىمدارعا ارنالعان مەملەكەتتىك الەۋمەتتىك تاپسىرىستار جانە گرانتتار تۋرالى زاڭ جوبالارى بويىنشا جۇمىس توپتارىنا قاتىسادى»، - دەيدى ول.
سونداي-اق، ەرلان قارين كەڭەس مۇشەلەرى كيبەربۋللينگ تۋرالى زاڭ جوباسىنىڭ قوعامدا قىزۋ پىكىرتالاس تۋدىرعان نورمالاردى پىسىقتاپ، وزگەرتۋگە اتسالىسقانىن ايتتى.
«كەڭەستىڭ الداعى جۇمىسى دا وتە قاۋىرت. ونىڭ مۇشەلەرىن جاستارعا قاتىستى ماڭىزدى باعدارلامالىق قۇجاتتاردى ازىرلەۋگە جۇمىلدىرۋ جوسپارلانىپ وتىر»، - دەدى ە. قارين.
ايتا كەتەيىك، پرەزيدەنت جانىنداعى جاستار ساياساتى كەڭەسىنىڭ جاڭا قۇرامداعى العاشقى جيىنى الماتىدا وتكەن بولاتىن.
اۆتور: ءالي يبرايەۆ
