الماتىداعى پرەزيدەنت رەزيدەنتسياسىن ءسۇرىپ تاستاۋعا 6 ميلليارد تەڭگە جۇمسالادى
بۇل تۋرالى پرەزيدەنتتىڭ ءىس باسقارۋشىسى ايبەك دادەبايەۆ Telegram-كانالىندا جازدى. «باق وكىلدەرىنەن پرەزيدەنتتىڭ الماتى قالاسىنداعى قيراتىلعان رەزيدەنتسياسىنا قاتىستى كوپتەگەن سۇراقتار كەلىپ جاتىر.
بۇگىنگى كۇنگى جاعداي تۋرالى ايتايىن. قازاقستاندىق كوپبەيىندى رەكونسترۋكتسيا جانە دامۋ ينستيتۋتىنىڭ تەحنيكالىق قورىتىندىسى بويىنشا رەزيدەنتسيانىڭ جاعدايى پايدالانۋعا شەكتەۋلى جارامدى دەگەن ساناتقا جاتقىزىلدى.
«قازرەستاۆراتسيا» ر م ك ماماندارى تەكسەرۋ جۇرگىزىپ، ولشەمدەرىن الدى، سونىڭ ناتيجەسىندە وبەكتىنى تاريح پەن مادەنيەت ەسكەرتكىشتەرىنىڭ تىزىمىنەن شىعارۋدى ۇسىندى. مادەنيەت جانە سپورت مينيسترلىگى تاريحي- مادەني ساراپتاما نەگىزىندە وبەكتىنى ەسكەرتكىشتەر تىزىمىنەن شىعارۋعا، شەشىم قابىلدادى: نەگىزگى عيمارات پەن ىرگەلەس وبەكتىلەر بولشەكتەنەدى»، - دەپ جازدى ول پاراقشاسىنا.
ايتۋىنشا، ەڭ الدىمەن، ساقتاۋلى تۇرعان، ياعني توڭازىتقىش تەحنيكالار، ۇزدىكسىز قۋات كوزدەرى، ديزەل- گەنەراتورلار - بارلىعى شامامەن 600 ميلليون تەڭگە سوماسىنداعى 46 اتاۋلى قۇرال- جابدىق شىعارىلادى.
«بۇل قۇرال- جابدىق ءىس باسقارماسىنىڭ باسقا وبەكتىلەرىندە قولدانىلاتىن بولادى. شامامەن 1800 توننا مەتالدى قايتا وڭدەۋگە جىبەرەمىز (بۇل دا بيۋدجەتكە قايتارىلاتىن 150 ميلليون تەڭگە). جالپى قايتارىلاتىن قاراجات - 750 ميلليون تەڭگە. نەگىزگى عيمارات پەن ىرگەلەس وبەكتىلەردى بولشەكتەۋ ءۇشىن 3 ميلليارد تەڭگە قاراستىرىلعان. تاعى 3 ميلليارد تەڭگە اۋماقتى قالپىنا كەلتىرۋگە جانە ينجەنەرلىك كورپۋستى قايتا قۇرىلىمداۋعا كوزدەلگەن، ولار قالانىڭ تەڭگەرىمىنە وتەتىن وبەكتىلەر. جۇمىستاردىڭ ورىندالۋى بيۋدجەتتىك وتىنىمدە ەگجەي- تەگجەيلى كورسەتىلگەن. رەزيدەنتسيانىڭ اۋماعىنداعى ءدوڭنىڭ استىندا ورنالاسقان ينجەنەرلىك كورپۋستى قايتا قالپىنا كەلتىرۋدى جوسپارلاپ وتىرمىز. ول ساياباقتىڭ لاندشافتىنا ساي كەلەدى. ونىڭ ىشىندە ترانسفورماتورلىق كىشى ستانتسيا ورنالاسقان، ول جاقىن ماڭداعى ۇيلەرگە، ينجەنەرلىك قۇرىلعىلارعا، قىزمەتكەرلەرگە ارنالعان ورىنجايلارعا قىزمەت كورسەتەدى. تولىق جۇمىس ىستەيتىن كوپبەيىندى ورىنجاي بولادى. قازىرگى كەزدە ونىڭ تىرشىلىككە ماڭىزدى توراپتارى كۇردەلى جوندەۋدى قاجەت ەتەدى، ياعني شاتىرىن زاماناۋي تۇرىنە اۋىستىرۋ، سۋاعارلار سانىن كوبەيتۋ، ينجەنەرلىك جابدىعىن تۇگەل اۋىستىرۋ قاجەت»، - دەيدى ايبەك دادەبايەۆ.
ونىڭ سوزىنە قاراعاندا، وبەكتىنىڭ سىرتىن ارلەۋ بويىنشا دا ۇلكەن جۇمىس جۇرگىزۋ كەرەك.
«وتىز جىلدا بۇل عيماراتتى سالعان كەزدەگى پايدالانۋ ستاندارتتارى دا ەسكىردى. وسىلايشا، ءبىز قالاعا دايىن اۋماق پەن جاڭارتىلعان ينجەنەرلىك كورپۋستى تاپسىرامىز»، - دەپ جازدى پرەزيدەنتتىڭ ءىس باسقارۋشىسى.
ەسىمجان ناقتىباي
