تارتىپسىزدىكتەر كەزىندە ۇستالعان 6 ادام زاڭسىز ازاپتاۋلاردان تەرگەۋ يزولياتورىندا كوز جۇمدى

نۇر-سۇلتان. قازاقپارات - قاڭتار ايىنىڭ باسىندا جاپپاي تارتىپسىزدىكتەر كەزىندە ۇستالعان التى ادام زاڭسىز ازاپتاۋلار كەسىرىنەن ۋاقىتشا ۇستاۋ يزولياتورىندا كوز جۇمعان.

بۇل تۋرالى باس پروكۋراتۋرانىڭ ارنايى پروكۋرورلار قىزمەتىنىڭ باستىعى ريزابەك وجاروۆ «كازاحستانسكايا پراۆدا» گازەتىنە بەرگەن سۇحباتىندا حابارلادى.

«جاقىندا عانا ءبىز تەرگەۋدە رۇقسات ەتىلمەگەن جاۋاپ الۋ ادىستەرىن قولدانۋ فاكتىلەرى بويىنشا قىلمىستىق ىستەردى قابىلدادىق. بۇرىن ولاردى تەرگەۋمەن سىبايلاس جەمقورلىققا قارسى قىزمەت ورگاندارى اينالىسقان. بىزگە مۇنداي ىستەردىڭ بارلىعى بىردەي بەرىلمەدى. تەك اۋىر جاعدايلار بويىنشا، دالىرەك ايتقاندا، ۇستالعانداردىڭ ءولىمى تىركەلگەن وقيعالار عانا بەرىلدى»، - دەدى باس پروكۋراتۋرانىڭ ارنايى پروكۋرورلار قىزمەتىنىڭ باستىعى ريزابەك وجاروۆ.

ۆەدومستۆونىڭ مالىمەتىنشە، مۇنداي جاعدايدا الماتىداعى ۋاقىتشا ۇستاۋ يزولياتورىندا ەكى ادام، شىعىس قازاقستان وبلىسىندا ءۇش ادام، تالدىقورعاندا ءبىر ادام قازا تاپقان.

«سونداي-اق، ءبىز ءالى دە تەرگەۋ يزولياتورىندا وتىرعان تالدىقورعان قالاسىنىڭ تاعى ءبىر تۇرعىنىنا قاتىستى ءىستى الدىق. ۇتىكپەن كۇيدىرىپ، ازاپتالعان ازاماتقا قاتىستى ءىس رەزونانستى جاعداي تۋعىزعان بولاتىن»، - دەپ قوستى ول.

بولعان جاعدايلار بويىنشا ءالى دە تەرگەۋ جالعاسۋدا.

Stan.kz