باس پروكۋراتۋرا: قىلمىستىق پروتسەستە ادام قۇقىعىن بۇزۋ 6 ەسە وسكەن

نۇر-سۇلتان. قازاقپارات – ق ر پالامەنت ماجىلىسىندە «قازاقستان رەسپۋبليكاسىندا قىلمىستىق قۋدالاۋ جانە جازانى ورىنداۋ سالاسىنداعى ادام قۇقىقتارى تۋرالى» تاقىرىبىندا ءوتىپ جاتقان جيىندا ەلدە قىلمىس سانى ازايعانىمەن ونى تەرگەۋ كەزىندە ازاماتتاردىڭ قۇقىعىن بۇزۋ فاكتىلەرى ەسەلەپ وسكەنى ايتىلدى، دەپ حابارلايدى قازاقپارات ءتىلشىسى.

بۇل تۋرالى ق ر باس پروكۋرورىنىڭ ورىنباسارى ەرلىك كەنەنبايەۆ ايتتى.

«مەملەكەت باسشىسىنىڭ تاپسىرماسى بويىنشا 2020 -جىلدان باستاپ ءۇش بۋىندى مودەلدى كەزەڭ- كەزەڭمەن ەنگىزۋگە كىرىستىك. بۇل رەفورما بىرنەشە سەبەپتەرگە نەگىزدەلگەن»، - دەپ باستادى باس پروكۋروردىڭ ورىنباسارى.

سونداي-اق ول قىلمىستىق پروتسەستەر كەزىندە جول بەرىلگەن زاڭسىزدىقتار بويىنشا پروكۋراتۋرا ورگاندارىنىڭ كەشىگىپ ارەكەت ەتەتىنى تۋرالى سىن كوپ ايتىلعانىن ەسكە الدى.

«قازاقستاندا سوڭعى 6 جىلدا قىلمىس سانى 2,5 ەسە تومەندەگەن. ءبىراق، سونىمەن قاتار، قىلمىستىق پروتسەستە ازاماتتاردىڭ قۇقىقتارىن بۇزۋ 6 ەسە وسكەن. قوعام تەرگەۋ جۇمىسىنىڭ ساپاسىنا نارازى بولدى. بىزگە ءىستى سوزبالاڭعا سالۋ، وكىلەتتىكتى تەرىس پايدالانۋ تۋرالى شاعىمداردىڭ شەكسىز اعىنى كەلىپ جاتتى. ءبىزدىڭ تاراپىمىزعا بۇل تۇرعىداعى زاڭ بۇزۋ فاكتىلەرىنە «پوستفاكتۋم» رەجيمدە نازار اۋدارعان دەگەن سىن ايتىلدى. پروكۋرورلار تەرگەۋ ماتەريالدارىمەن تەك ءىستى سوتقا جولداردىڭ الدىندا عانا نەمەسە ءىس ىركىلگەندە جانە توقتاتىلعان كەزدە عانا تانىسىپ كەلدى. باسقاشا ايتساق، پروكۋورلار سوتقا دەيىنگى تەرگەۋ ىستەرىنە فورمالدى تۇردە عانا ارالاسىپ كەلگەن ەدى»، - دەدى ەرلىك كەنەنبايەۆ.

ونىڭ ايتۋىنشا، قىلمىستىق پروتسەدۋرالاردىڭ ءۇش بۋىندى مودەلى ەنگىزىلە باستاعان تۇستان بەرى پروكۋرورلاردىڭ زاڭ اياسىنداعى مۇمكىندىگى ارتقان.