تۇركىستان وبلىسىنان سولتۇستىك وڭىرلەرگە 6 مىڭنان استام ادام قونىس اۋدارعان
بۇگىنگە دەيىن سولتۇستىك ايماقتارعا كوشكەن وتباسىنىڭ ءاربىر مۇشەسىنە 102 مىڭ تەڭگە بەرىلسە، ەندى ەكى ەسەلەنىپ 204 مىڭ تەڭگە تولەنەتىن بولدى. تۇرعىن ۇيمەن، جۇمىسپەن قامتاماسىز ەتۋ ءوز الدىنا بولەك جۇرەدى. دەگەنمەن كوشتىڭ ۇدەرە جۇرۋىنە كەدەرگى كەلتىرەتىن پروبلەما دا كوپ. بۇگىن سول تۇيىتكىلدەردى «Nur otan» پارتياسى تۇركىستان وبلىستىق فيليالىنىڭ ۇيىمداستىرۋىمەن كەڭ كولەمدە تالقىلاندى. ونلاين فورماتتا وتكەن جيىنعا سولتۇستىك قازاقستان، شىعىس قازاقستان، پاۆلودار، قوستاناي وبلىستارىنداعى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىلارى مەن وڭىردەگى جۇمىسپەن قامتۋ ورتالىقتارىنىڭ ماماندارى قاتىستى.
«العاشقى كەزەكتە «ەڭبەك» باعدارلاماسىنىڭ ەلدى- مەكەندەردە ناسيحاتى كەم. ونىڭ ۇستىنە كارانتين دە سەبەپ بولىپ، وتكەن جىلى نەبارى 347 وتباسى عانا كوشىپتى. ال، 2019 -جىلى 560 وتباسى قونىس اۋدارعان ەدى. ەندى وسى مەجەدەن اسىرۋ باستى جوسپار بولىپ وتىر. جالپى اتالعان 4 وبلىسقا بيىل 6039 ادامدى قابىلداۋ مىندەتى قويىلدى. سونىڭ ىشىندە سولتۇستىك قازاقستان وبلىسى 2347 ادامدى قارسى الۋعا قىزۋ دايىندالۋدا. باسقارما باسشىسىنىڭ ورىنباسارى رينات سەرگەي ۇلى ولار ءۇشىن ارنايى ۇيلەر تۇرعىزىلىپ جاتقاندىعىن ايتتى. الايدا پاۆلوداردان وزگە ەكى وڭىردە قونىس اۋدارۋشىلار ءۇشىن جاڭا باسپانالار سوعىلىپ جاتقان جوق. نەگىزىنەن بوساپ قالعان ۇيگە ورنالاستىرادى. سونىمەن بىرگە وڭىرلەر اراسىندا ورتاق اقپاراتتىق بازا قالىپتاسپاعان. قاي ايماقتا قانداي جۇمىس ورىندارى بار، باسپانا باعاسى، شارۋاشىلىق جايى ت ب مالىمەتتەردى اركىم وزىنشە ىزدەپ، اۋرەگە تۇسۋدە. تولىق مالىمەت الماعاندىقتان كوپشىلىكتىڭ كوكەيىندە كۇمان قالىپ، تولىق سەنە بەرمەيدى»،-دەيدى «Nur otan» پارتياسى تۇركىستان وبلىستىق فيليالى ءتوراعاسىنىڭ ورىنباسارى بەيسەن تاجىبايەۆ. جيىندا سونىمەن قاتار كوشىپ بارعانەدارعا جاناشىرلىق جەتىسپەيتىنى ايتىلدى. بۇل ەلىمىزدە كوشى- قون سالاسىمەن اينالىساتىن اتقارۋشى جۇيەگە ءتان كەمشىلىك دەيدى ماماندار.
«ماسەلەن، اقپارات سۇراپ كەلگەن تۇرعىندارعا جۇمىسپەن قامتۋ ورتالىعىنىڭ ماماندارى تياناقتى تۇسىندىرمەيدى. نەمەسە كەلەسى مامانعا سىلتەي سالادى. قىسقاسى ساندالتادى. ونسىز دا قىسىلىپ، جاۋتەڭدەپ جۇرگەن تۇرعىن بۇدان سوڭ تىپتەن كوڭىلى قالادى، سەنبەيدى، كوشپەيدى. ىسكەر، ەلشىل فەرمەر- كاسىپكەرلەر اۋاداي قاجەت. ازىرگە وبلىستا جاڭاباي اعابەكوۆ سىندى ازاماتتار از بولىپ تۇر. بۇل كاسىپكەردىڭ قولداۋىمەن ءساۋىر ايىنىڭ سوڭىندا 3 اۆتوبۋس سولتۇستىك وبلىستاردى ارالاپ قايتۋشىلاردى تەگىن اپارىپ، الىپ قايتادى. كەيىن ناقتى شەشىم قابىلداعاندا وتباسىمەن بىرگە، بيۋدجەتتەن بولىنگەن قارجىنىڭ كومەگىمەن كوشە بەرەدى. مەنىمشە وسىنداي كاسىپكەرلەر سول وڭىرلەردەن جەر تەلىمدەرىن الىپ، وڭتۇستىكتەن جۇمىس كۇشىن تارتقاندا عانا باعدارلاما ومىرشەڭ بولا تۇسەدى»،- دەيدى ماماندار. جيىندا وسى سىندى ماسەلەلەردى كەڭىنەن تالقىلاعاندار ورتاق شەشىمگە كەلدى. ءسويتىپ بارلىق اۋداندا باعدارلاماعا جاۋاپتى جەكە مامان بەكىتىلىپ، ورتاق ينتەرنەتتىك اقپاراتتىق بازا قالىپتاساتىن بولدى. ءتورت وبلىستىڭ وكىلدەرى تاياۋدا تۇركىستان وبلىسىن كەڭىنەن ارالاۋ ءۇشىن دەلەگاتسيا توبىن اتتاندىرماق. زاڭداعى كەمشىن تۇستاردى تولىقتىرۋ ءۇشىن ارنايى ۇسىنىمدار ازىرلەنەدى. ونى پارلامەنت ماجىلىسىندەگى دەپۋتاتتارعا جولداپ، جاۋاپتى مينيسترلىكپەن بىرگە تالقىلاۋلار ۇيىمداستىرۋعا اتسالىساتىن بولىپ شەشىلدى.
