اتىراۋدا جوعالعان شوپان 6 كۇننەن بەرى تابىلماي جاتىر
وبلىستىق توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، 10 -ناۋرىزدا يساتاي اۋدانىنداعى شارۋا قوجالىعىنىڭ شوپانى جوعالىپ كەتكەن.
«فەرمەرلەردىڭ ايتۋىنشا، 10 -ناۋرىزدا ەكى شوپان وتاردى ورىسكە شىعارعان. ونىڭ ءبىرى - 60 جاستاعى ازامات جاڭا تۋعان قوزىنى ۆلفپ، تۇيەمەن قىستاۋعا بەتتەگەن. ال، ەكىنشى شوپان كەشكە وتاردى قىستاققا اكەلگەن. جوعالعان شوپاندى ىزدەۋ سول كۇنى، 10 ناۋرىزدا باستالدى. وعان اۋداندىق توتەنشەلىكتەر مەن پوليتسيا قىزمەتكەرلەرى جۇمىلدىرىلدى»- دەپ حابارلادى دەپارتامەنتتىڭ باسپا ءسوز قىزمەتى.
الايدا، ازىرگە ىزدەستىرۋ جۇمىسىنان ناتيجە شىققان جوق. سوعان بايلانىستى بۇگىن، 16-ناۋرىزدا «قازاۆياقۇتقارۋ» رمك اتىراۋ فيليالىنىڭ مي-8 تىكۇشاعى تارتىلدى.
«بەس ساعاتقا جۋىق اۋەدەن ىزدەستىرۋ جۇرگىزىلدى. تىكۇشاقپەن يساتاي، سونداي- اق كورشىلەس ماحامبەت جانە يندەر اۋداندارىنىڭ باتىس قازاقستان وبلىسىنىڭ اۋماقتىق شەكاراسىنا دەيىنگى شالعاي ۋچاسكەلەر زەرتتەلدى. توتەنشە جاعدايلار دەپارتامەنتىنىڭ قىزمەتكەرلەرى شالعايدا قاراۋسىز قالعان قىستاۋلاردى دا تەكسەردى» - دەپ ءمالىم ەتتى دەپارتامەنتتىڭ باسپا ءسوز قىزمەتىنەن.
قازىر جول تالعامايتىن «ترەكول» جانە وزگە دە كولىكتەرمەن 4 توتەنشەلىك، 10 پوليتسەي، سونداي- اق جوعالعان مالشى جۇمىس ىستەگەن شارۋا قوجالىعىنىڭ 2 قىزمەتكەرى جۇمىلدىرىلعان ىزدەستىرۋ جۇمىسى جالعاسۋدا. ەسكە سالا كەتەلىك، بۇدان بۇرىن اتىراۋدا جۇمىسىنا كەتكەن ەر ادام ىزدەستىرىلىپ جاتقانىن جازعان بولاتىنبىز.