سولتۇستىك قازاقستان تۇرعىنى باقشاسىنا قاربىز ەگىپ، 6 تونناعا جۋىق ءونىم الدى

س ق و ەسىل اۋدانى كورنەيەۆكا ەلدى مەكەنىندەگى مالۆەنوۆتەر وتباسى 10 سوتىق جەرگە قاربىز ەگىپ، ءوڭىر ءۇشىن رەكوردتىق ءونىم الدى. ءارقايسىسى شامامەن 7 كەلىدەن. اراسىندا 12-14 كەلى تارتاتىندارى دا بار. وتاعاسى نيكولاي مالۆەنوۆ قاربىز ءوسىرۋدى 3 جىل بۇرىن قولعا العان ەكەن.

«ينتەرنەتتى قاراپ وتىرىپ، نيكولاي رەسەيدەگى بارناۋىلدا، كەمەروۆو وبلىسىندا قاربىز ءوسىرىپ، جاقسى ءونىم العانداردى كوردى. ولاردىڭ اۋا رايى بىزدىكىمەن ۇقساس، ءبىر ەندىكتە جاتىرمىز. سودان باستاپ قىزىعۋشىلىعى باستالدى»، - دەيدى نيكولايدىڭ زايىبى ەلەنا.

ءبىرىنشى جىلى شاعىن عانا جەرگە ەككەن ولار، بيىل كارتوپتىڭ ورنىن تولىق وسى قاربىزعا ارناپتى. 300 ءتۇپتىڭ ءارقايسىسى ورتاشا 20 كەلىدەن بەرگەن.

«قاربىزدىڭ 30 سۇرپىن ەكتىك. اراسىندا «ۆيكتوريا»، «توپ گان»، «اتامان»، «استراحانسكيي»، «كريمسون سۆيت» سياقتى تانىمال تۇرلەرى بار. كۇيەۋىم ولاردى ماسكەۋدەن الدىرادى. ەليتالىق تۇقىم، ءبىزدىڭ اۋا رايىنا بەيىمدەلگەن. اراسىندا ەكزوتيكالىق ءتۇرى، ءدامى وزگەشە - سارىلارى دا بار. قازىر ءبىز تاجىريبەدەن وتكىزىپ جاتىرمىز. ولاردىڭ ونىمدىلىگىنە عانا ەمەس، دامىنە، ساپاسىنا دا قارايمىز. كەيىن ارينە، اراسىنان تاڭداپ الامىز»، - دەيدى ەلەنا.

نيكولايدىڭ دا، ەلەنانىڭ دا اگرونومياعا قاتىسى جوق. نيكولاي مالۆەنوۆ - كولىك جۇرگىزۋشىسى. الىسقا قاتىنايتىن جۇك كولىكتەرىن جۇرگىزەدى. ەلەنانىڭ اۋىلدا ءوز كاسىبى بار، دۇكەن ۇستايدى. وتاعاسى بۇگىنگىدەي جولعا شىققاندا ونىڭ قاربىزدارىن كۇتىپ- باپتايتىن وسى - ەلەنا.

«قاربىزدىڭ كوشەتىن ءساۋىر ايىنىڭ سوڭىندا ەگەمىز. جىلۋسۇيگىش وسىمدىك قوي. توپىراق تەمپەراتۋراسى 16 گرادۋستان تومەن بولسا تامىرلارى ءولىپ قالادى. بيىل مامىر ايىنىڭ باسىندا وتىرعىزدىق. كەيىن ەكى اپتاعا كۇن سۋىتىپ كەتتى. سول كەزدە ۇسىككە ۇرىندىرىپ الىپ، وسكىندەردىڭ %30 شىقپاي قالدى. سوندىقتان ۇنەمى جاۋىپ، بايقاپ وتىرۋ قاجەت. العاشقى قاربىزدى وسى جىلى شىلدە ايىنىڭ ورتاسىندا الدىق. قازىر ءونىمدى ەكىنشى رەت جيناپ جاتىرمىز»، - دەيدى ول.

ەلەنانىڭ ايتۋىنشا، س ق و- دا وسكەن قاربىزعا اسىرەسە، اۋىلداستارىنىڭ اراسىندا سۇرانىس جوعارى. جەرگىلىكتى قاربىزدى وسىرۋگە پەستيتسيدتەر قولدانىلمايدى. ەكولوگيالىق تازا ءونىم بولعاندىقتان حوش ءيىستى، ءدامى دە ءتىل ۇيىرەدى.

«نيكولايدىڭ ايتۋىنشا، قاربىزدى وسىرۋدە ءۇش نارسەگە اسا ءمان بەرۋ قاجەت. ەڭ الدىمەن تۇقىم جاقسى بولۋى كەرەك. ەكىنشىدەن تامشىلاتا سۋارىلۋى قاجەت. ال ۇشىنشىدەن قاربىزدى وسىرەمىن دەگەن ۇلكەن نيەت بولۋى كەرەك. تەك ەڭبەكتىڭ ارقاسىندا عانا ءبىزدىڭ وڭىردە دە جاقسى ءونىم الۋعا بولادى»، - دەيدى ەلەنا.

مالۆەنوۆتەر وتباسى ءالى ءبىر جىلداي قاربىز ءوسىرۋ ىسىندە تاجىريبە جيناماقشى. ال كەيىن ونى تابىس كوزىنە اينالدىرماق.

اۆتور: اقەركە داۋرەنبەك قىزى