بيىل 6 مىڭنان استام ادام قانداس مارتەبەسىن الدى
بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.
ورتالىق كوممۋنيكاتسيالار قىزمەتىندە ونلاين رەجيمدە وتكەن حالىققا ەسەپ بەرۋ كەزدەسۋى بارىسىندا مينيستر 1991 -جىلدان بەرى 1 ميلليوننان استام ەتنيكالىق قازاق تاريحي وتانىنا قايتا ورالىپ، ولاردىڭ ءبارى ورالمان مارتەبەسىن العانىن اتاپ ءوتتى. بۇل ەلىمىزدەگى حالىقتىڭ 6 پايىزىن قۇرايدى.
«بيىل 1-ماۋسىمداعى جاعداي بويىنشا رەسپۋبليكامىزعا 3245 وتباسى، 6361 ەتنيكالىق قازاق كوشىپ كەلدى. ورالماندار مەن قونىس اۋدارۋشىلاردان تۇراتىن جالپى سانى 2224 ادامدى قۇرايتىن 631 وتباسى شىعىس قازاقستان وبلىسى، سولتۇستىك قازاقستان وبلىسى، اقمولا، پاۆلودار، قوستاناي وبلىستارىنا ورنالاستى»، - دەدى ءبىرجان نۇرىمبەتوۆ.
سونىمەن قاتار، ول وسى جىلدىڭ 13-مامىرىندا مەملەكەت باسشىسى كوشى-قون پروتسەستەرىن جەتىلدىرۋ تۋرالى زاڭعا قول قويعانىن اتاپ ءوتتى. وندا «قانداس» تۇسىنىگى ەنگىزىلدى. وعان سايكەس ەتنيكالىق قازاقتىڭ بۇرىن قازاقستان رەسپۋبليكاسىنىڭ ازاماتتىعىندا بولماعاندىعى باستى ولشەم بولىپ سانالادى. اتاجۇرتىنا ورالعان قانداستارىمىزدىڭ تۇراقتى تۇرۋعا رۇقسات الۋ ءۇشىن دە، قازاقستان ازاماتتىعىن الۋ ءۇشىن دە قۇجاتتاردى ءبىر ۋاقىتتا ۇسىنۋ قۇقىعى بولادى. سونىمەن قاتار، مينيستر شەتەلدىك جۇمىس كۇشىن تارتۋ كۆوتاسى 2019 -جىلمەن سالىستىرعاندا 40 پايىزعا ازايعانىن اتاپ ءوتتى.
«جىل باسىنان بەرى 7,7 مىڭنان استام شەتەلدىك جۇمىس كۇشىن تارتۋعا رۇقسات بەرىلدى. جۇمىس بەرۋشىلەر 2,8 ميلليارد تەڭگە كولەمىندە سالىق تولەدى. بۇل رەتتە كادرلارداعى قازاقستاندىق قامتۋدى قامتاماسىز ەتۋ تالابىن ورىندايتىن كومپانيالاردىڭ ۇلەسى قازىر 96 پايىزدى قۇراپ وتىر»، - دەدى ءبىرجان نۇرىمبەتوۆ.
اۆتور: مارلان جيەمباي