اقتوبەدە وكپەسى قابىنعاندار سانى 6 ەسە ءوستى
قازىر وڭىردە قوسىمشا ستاتسيونار دايىندالىپ جاتىر، دەپ حابارلايدى قازاقپارات ءتىلشىسى.
«وكپەنىڭ قابىنۋى دەرتى 15-ماۋسىمنان باستاپ كوپ تىركەلدى. ماۋسىم ايىنىڭ العاشقى اپتاسىنان بەرى ناۋقاستار سانى 6 ەسە وسكەن. ناۋقاستار ءۇشىن اۋرۋحانالاردىڭ ءبارى دايىندالدى. قازىر تۋبەركۋلەزگە قارسى ديسپانسەرگە دەزينفەكسيا جاسالىپ، وندا جاتقان ادامداردىڭ كەيبىرى ۇيىنە شىعارىلدى. ال 55 ادام تەمىر اۋدانى ديسپانسەرىنە جىبەرىلدى. ولارعا قاجەتتى دارىگەرلەر دە اۋدانعا بارىپ، ەم جۇرگىزەدى. وزگە دارىگەرلەر جۇمىسىن جالعاستىرادى. ديسپانسەر ەرتەڭ قابىلداۋدى باستايدى. مۇندا 400 كەرەۋەت بار»، - دەدى وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى سۆەتلانا ەسەنامانوۆا.
ايتا كەتەيىك، بۇعان دەيىن وكپەنىڭ قابىنۋى دەرتىنەن 18 ادام كوز جۇمدى. سوڭعى تاۋلىكتە تاعى 4 ادام قايتىس بولدى. قازىر 10 ادام جاساندى تىنىس الۋ اپپاراتىنا قوسىلعان.