قوردايدا 6 اۋىلدىڭ اقساقالدارى باس قوستى

نۇر-سۇلتان. قازاقپارات – بۇگىن قورداي اۋدانىندا 6 اۋىلدىڭ اقساقالدارى باس قوسىپ، مامىلەگە كەلدى، دەپ حابارلايدى «حابار 24».

ەندى جەرگىلىكتى قاريالار مەن اۋداننىڭ بەدەلدى ازاماتتارى ءتالىم- تاربيە، ءتۇسىندىرۋ جۇمىستارىن تۇراقتى تۇردە جۇرگىزۋگە اتسالىسادى. وسى ءۇشىن «قوعامدىق كەلىسىم» كەڭەسى قۇرىلدى.

- جاعداي تۇراقتى. توتەنشە جاعداي زارداپتارىن جويۋ باعىتىنداعى جۇمىستار ءجۇرىپ جاتىر. جولدار مەن بۇلىنگەن نىسانداردىڭ اينالاسى تازارتىلۋدا. ال جاڭا عانا اۋىل اقساقالدارى دوڭگەلەك ۇستەل باسىنا جينالىپ، كەڭەس وتكىزدى. ولار داستارحان باسىندا پىكىر، ۇسىنىستارىن ءبىلدىرىپ، تۇرعىنداردى اۋىزبىرشىلىككە شاقىردى. بۇدان كەيىن اۋداننىڭ قاريالارى كەز كەلگەن ماسەلەنى دەر كەزىندە كوتەرىپ، ورتاق ءبىر شەشىمگە كەلۋدىڭ ماڭىزدىلىعىن ايتىپ، يدەولوگيالىق جۇمىستاردى بىرلەسىپ ىستەۋگە ۋاعدالاستى. «قوعامدىق كەلىسىم» كەڭەستىڭ قۇرامىنا اقساقالداردان بولەك، اۋداننىڭ بەدەلدى، بەلسەندى ازاماتتارى دا كىرەدى.

نوعاي جايىقبايەۆ، قاراكەمەر اۋىلىنىڭ اقساقالى:

- دۇڭعان، قازاق، ورىس، تاتار دەپ بولۋگە بولمايدى. ءبارىمىز ءبىر شاڭىراقتىڭ استىندا وتىرمىز. وسى جەردىڭ ءدامىن، سۋىن تاتىپ، ءىشىپ وتىرعاننان كەيىن وسى جەردىڭ ءسوزىن سويلەۋىمىز كەرەك! بىرلىك بولسا، تىرلىك بولادى.

جالپى ءبىر عانا ماسانچي اۋىلدىق وكرۋگىندە 18 مىڭنان استام حالىق تۇرادى. بۇگىن وسى ەلدى مەكەندەگى جانجال كەزىندە زاقىمدانعان نىسانداردىڭ اينالاسى تازارتىلىپ، 100 توننادان استام كۇل- قوقىس سىرتقا شىعارىلدى. جۇرت ۇيلەرىنە ورالىپ، كۇندەلىكتى تىرشىلىگىن ىستەپ ءجۇر.

تۇرعىندارعا ىڭعايلى بولۋ ءۇشىن جىلجىمالى حالىققا قىزمەت كورسەتۋ ورتالىعى جۇمىس ىستەپ تۇر. بۇگىنگى كۇنگە دەيىن ونداعان ادام مەن بالا- شاعانىڭ قۇجاتتارى راسىمدەلىپ، قايتا قالىپقا كەلتىرىلگەن. موبيلدى حالىققا قىزمەت كورسەتۋ ورتالىعىندا ماماندار تاڭعى ساعات 9-دان كەشكى 19:00-گە دەيىن قىزمەت كورسەتىپ جاتىر.

www.24.kz