الماتى ماڭىنداعى ۇشاق اپاتى: اۋرۋحانادا جاتقان 6 ادامنىڭ جاعدايى اۋىر

ۇشاق اپاتىنان بارلىعى 68 ادام جاراقات الدى، ولاردىڭ 51 ءى اۋرۋحاناعا جاتقىزىلدى، ونىڭ توعىزى بالا. 7 ادام العاشقى مەديتسينالىق كومەكتەن كەيىن امبۋلاتوريالىق باقىلاۋعا جىبەرىلدى.

12 ادام قازا تاپتى. ولاردىڭ 8 ءى وقيعا ورنىندا، 2 ءەۋى تاسىمالداۋ كەزىندە جانە 2 ەرەسەك ادام العان جاراقاتتارىنان №4 قالالىق كلينيكالىق اۋرۋحانادا قايتىس بولدى.

«قازىرگى ۋاقىتتا اۋرۋحانالاردا 37 ناۋقاس جاتىر، ولاردىڭ 6 اۋىنىڭ جاعدايى تۇراقتى اۋىر، 31 ءنىڭ جاعدايى ورتاشا. الماتى قالالىق جەدەل شۇعىل كومەك كورسەتۋ اۋرۋحاناسىندا جاتقان 7 ادام جانە №4 قالالىق كلينيكالىق اۋرۋحانادان 1 ناۋقاس ۇيىنە شىقتى. ولار ءارى قاراي امبۋلاتوريالىق ەم قابىلدايدى. سونىمەن قاتار، ورتالىق كلينيكالىق اۋرۋحانادان ءبىر ناۋقاس، الماتى كوپسالالى كلينيكالىق اۋرۋحاناسىنان ەكى ەرەسەك جانە ءبىر بالا ۇيلەرىنە شىعارىلدى» ، - دەپ حابارلادى باسقارمادان.

قازىرگى ۋاقىتتا شۇعىل مەديتسينالىق جاردەم ورتالىعىندا 8 بالا؛ № 4 قالالىق كلينيكالىق اۋرۋحاناسىندا 17 ەرەسەك ادام؛ الماتى قالالىق جەدەل شۇعىل كومەك كورسەتۋ اۋرۋحاناسىندا 5 ەرەسەك ادام؛ ورتالىق قالالىق اۋرۋحانادا 3 ەرەسەك؛ الماتى كوپسالالى كلينيكالىق اۋرۋحاناسىندا 3 ەرەسەك ادام؛ «پريۆات» كلينيكاسىندا 1 ناۋقاس جاتىر.

اۋرۋحانالاردىڭ جانساقتاۋ بولىمىندە 6 ناۋقاس جاتىر. بارلىعى ەرەسەك ادامدار. 21 ادامعا وتا جاسالدى. ونىڭ ىشىندە 2 بالا بار. مەديتسينالىق كومەك، دياگنوستيكالىق تەكسەرۋلەر، ءدارى- دارمەكپەن قامتاماسىز ەتۋ تولىق كولەمدە كورسەتىلىپ جاتىر.

«كۇن سايىن الماتى جانە نۇر- سۇلتان قالالارىنىڭ جانە رەسپۋبليكالىق مەديتسينا ۇيىمدارىنىڭ دارىگەرلەرى كونسيليۋم وتكىزەدى» ، - دەپ تولىقتىردى باسقارما باسپا ءسوز قىزمەتى.

سونداي- اق، ۇشاق اپاتىنان زارداپ شەككەندەرمەن جانە قايتىس بولعانداردىڭ وتباسىلارىمەن 57 پسيحولوگ جۇمىس ىستەپ جاتىر. كەزەكشى پسيحولوگتاردىڭ كەستەسى جاسالىپ، بارلىق نىساندارعا تاراتىلدى.