بايان-ولگي ايماعىندا 6 تاۋلىككە كارانتين جاريالاندى
جەرگىلىكتى ب ا ق- تىڭ حابارلاۋىنا قاراعاندا، 28 -ءساۋىر كۇنى بايان-ولگي ايماعىنا قاراستى نوگوونۋۋر اۋدانىنىڭ اقكول قالاشىعىندا بەلگىسىز اۋرۋمەن ەكى ادام سىرقاتتانادى. ەرلى-زايىپتىلار 1 -مامىر كۇنى تاڭعا جۋىق قايتىس بولعان.
سىرقاتتاردىڭ نەدەن قايتىس بولعانىن تەكسەرۋ بارىسىندا ولار وبا اۋرۋىمەن اۋىرعانى انىقتالدى.
وسىعان بايلانىستى 1 - مامىر كۇنى تاڭعى ساعات 6 دان باستاپ وڭىردە 6 تاۋلىكتىك كارانتين جاريالاندى.
قازىرگى كەزدە بايان-ولگي ايماعىنىڭ ولگي قالاسىنا كىررەتىن، شىعاتىن بارلىق قوزعالىسقا شەكتەۋ قويىلعان. سونىمەن قاتار، رەسەي مەن موڭعوليا اراسىنداعى تاشانتا- قىزىل ءۇي شەكارالىق تەكسەرۋ-وتكىزۋ بەكەتى دە ۋاقىتشا جابىلدى.
«قازىرگى ۋاقىتتا وبا (سۋىر دەرتى - رەد. ) اۋرۋىنان قايتىس بولعان ەكى ادامنان باسقا سىرقات تىركەلگەن جوق. بۇل اۋامەن ەمەس بەز ارقىلى جۇعاتىن ءتۇرى. ياعني، سىرقاتتانعان ادامعا بايلانىس جاساعان، قارىم-قاتىناستا بولعان ادامدار اۋىرۋى مۇمكىن. سونىمەن قاتار، سىلەكەي ارقىلى، قان ارقىلى جۇعاتىن ءتۇرى» - دەپ جازادى جەرگىلىكتى ب ا ق.
قازىرگى تاڭدا بايان-ولگيدەگى جاعداي قالىپتى، كارانتين ءالى الىنعان جوق. شەكارا دا جۇمىس ىستەمەيدى.
BAQ. KZ