جاقسىلىق جاسا: اقمولالىق كاسىپكەر 6 بالانىڭ اناسىنا پاتەر ساتىپ الىپ بەردى
جاس كاسىپكەر ءوزىنىڭ قايىرىمدىلىق ىسىمەن ماقتانبايدى. كەرىسىنشە، مۇقتاج جاندارعا كومەكتەسۋ كەز- كەلگەن ادامنىڭ پارىزى دەيدى. سول سەبەپتى جىل سايىن تۇرمىسى تومەن وتباسىلارعا كومەكتەسىپ تۇرادى. ياعني، جاس كاسىپكەردىڭ سوزىنشە، قايىرىمدىلىق جاساۋ جىل سايىنعى جاسالاتىن «زەكەت» سياقتى.
«قورعالجىن اۋداندىق جاستار رەسۋرستىق ورتالىعىنا حابارلاستىم. ونداعىلار ماعان باسپاناعا مۇقتاج كوپبالالى وتباسىن تابۋعا كومەكتەستى. مەنىڭ اتالارىم وسىندا تۋىپ وسكەن. اتام تىڭ يگەرۋ كەزىندە ەڭبەك ەتتى. كەيىن 2000 -جىلدارى اكەم ەكەۋى اۋداننان جەر الىپ، ءوز كاسىبىن اشتى. كەيىن ولار قايتىس بولعان سوڭ، مەن تۋعان جەرىمە قايتىپ ورالىپ، اتام مەن اكەمنىڭ باستاعان ءىسىن جالعاستىرماق بولدىم» ، - دەيدى «ميراس-2000» ج ش س ديرەكتورى دالەل جۇزبايەۆ.
باسپانالى بولعان باقىتگۇل قاۋىسوۆا مەن ونىڭ التى بالاسىنىڭ قۋانىشىندا جەك جوق. قورعالجىن اۋداندىق جاستار رەسۋرستىق ورتالىعىنىڭ مالىمەتى بويىنشا، بۇل وتباسى اقمولا وبلىسىنا الماتىدان كەلگەن جانە وسى ۋاقىتقا دەيىن تۋىسقاندارىنىڭ ۇيىندە تۇرىپ كەلگەن.
«دالەل بىزگە كەلىپ، كوپبالالى وتباسىنا كومەكتەسكىسى كەلەتىن، ياعني، پاتەر ساتىپ الىپ بەرەتىنىن ايتتى. مەن كومەك قاجەت ەتەتىن وتباسىن تابۋعا كومەكتەستىم. سونداي- اق، دوستارىممەن جيھاز، تەلەديدار الىپ بەردىك. مەن بۇل وتباسىنا بۇعان دەيىن دە كومىر ساتىپ الۋعا كومەكتەسىپ تۇردىم» ، - دەيدى قورعالجىن اۋداندىق جاستار رەسۋرستىق ورتالىعىنىڭ ديرەكتورى اسەت داڭعىلوۆ.
ورتالىق ماماندارى دالەل سياقتى قايرىمدى جانداردىڭ جاستار اراسىندا ۇلگى- ونەگە بولاتىنىن ايتۋدا.
