ەكى ميلليون ەۋرو ايىپپۇل سالىنعان فۋتبولشى رونالدينونىڭ شوتىنان 6 ەۋرو عانا تابىلدى

استانا. قازاقپارات - برازيليانىڭ ريۋ-گراندي- دۋ-سۋل شتاتىنىڭ پروكۋراتۋراسى ەكى ميلليون ەۋرو ايىپپۇل سالىنعان بۇرىنعى فۋتبولشى رونالدينونىڭ شوتىندا نەبارى 24 رەال عانا قالعاندىعىن انىقتاعان.

بۇل سوما التى ەۋروعا تەڭ، دەپ حابارلايدى Marca.

2015 -جىلى رونالدينوعا اعاسىمەن بىرگە تىيىم سالىنعان جەردە قويما جانە بالىق اۋلاۋ پلاتفورماسىنىڭ زاڭسىز قۇرىلىسىن جۇرگىزگەنى ءۇشىن ايىپپۇل سالىندى. قازىرگى كەزدە ايىپپۇل كولەمى 8,5 ميلليوننان استام برازيليالىق رەالدى (2 ميلليون ەۋرو) قۇراپ وتىر.

رونالدينو مەن اعاسى ايىپپۇلدى تولەمەگەندىكتەن، سوت ولاردىڭ ءتولقۇجاتتارىن الىپ، شوتتارىن تەكسەرۋ شەشىمىن قابىلدادى.