پولشادا 6 قازاقستاندىق بوكسشى قىز جارتىلاي فينالعا شىقتى

استانا. قازاقپارات - پولشادا بوكستان ايەلدەر اراسىندا ءوتىپ جاتقان حالىقارالىق تۋرنيردە التى قازاقستاندىق بوكسشى جارتىلاي فينالعا شىقتى، دەپ حابارلايدى قازاقپارات ءتىلشىسى.

ق ر بوكس فەدەراتسياسىنىڭ باسپا ءسوز قىزمەتى ءمالىم ەتكەندەي، اتالعان دودانىڭ ءۇشىنشى كۇنى شارشى الاڭعا شىققان بەس بوكسشى قىزىمىزدىڭ بارلىعى قارسىلاستارىن ايقىن باسىمدىقپەن ۇتىپ، جارتىلاي فينالعا جولداما الدى.

ايتالىق، ايگەرىم قاسەنايەۆا (49 كەلى) شيرەك فينالدا كانادالىق ەنن ماركوتتى تىزە بۇكتىرسە، جاينا شەكەربەكوۆا (51 كەلى) ¼ كەزەڭىندە فرانسيالىق دەلفين مانسينيدى 5:0 ەسەبىمەن ۇتتى.

ال، كارينا يبراگيموۆا (60 كەلى) شۆەتسيا كورولدىگىنىڭ وكىلى اگنەس الەكسيۋسسوندى جەڭىپ، جارتىلاي فينالعا جولداما السا، ۆلادا كۋحتا (57 كەلى) كانادالىق سابرينا اۋبيننىڭ (كانادا) شارشى الاڭعا شىقپاۋىنا بايلانىستى كەلەسى كەزەڭگە ءوتتى.

سوڭعى بولىپ رينگكە كوتەرىلگەن ءلاززات كۇنگەيبايەۆا (81+ كەلى) پاتريتسيا براۋننان (پولشا) باسىم ءتۇستى. تورەشى ءبىرىنشى راۋندتا-اق كەزدەسۋدى توقتاتىپ، جەڭىستى جەرلەسىمىزگە بەردى. سونىمەن قاتار، 12- قىركۇيەك كۇنى تاعى ءبىر وتانداسىمىز ميلانا سافرونوۆا دا (64 كەلى) شيرەك فينالداعى قارسىلاسىن ۇتىپ، جارتىلاي فينالعا وتكەن بولاتىن.

وسىمەن 13-رەت ءوتىپ وتىرعان حالىقارالىق تۋرنيرگە قازاقستان رەسپۋبليكاسىن قوسقاندا 21 ەلدىڭ وكىلدەرى قاتىسىپ جاتىر. جارىس 15- قىركۇيەك كۇنى مارەسىنە جەتەدى.

اۆتور: كۇنسۇلتان وتارباي