اقمولادا 6 جاسار بەكمانسۇر كولىك سۇيرەپ، رەكورد ورناتتى
بۇل تۋرالى ءامىر ماحمەت ەسىمدى فەيسبۋك قولدانۋشى ءوز پاراقشاسىندا جاريالادى، دەپ حابارلايدى قازاقپارات ءتىلشىسى.
اۆتوردىڭ جازباسىندا كورسەتىلگەندەي، وقيعا «دەنساۋلىق كۇنى» فەستيۆالىندە سەلينوگراد اۋدانىنىڭ قاجىمۇقان اۋىلىندا بولعان.
«بۇگىن «دەنساۋلىق كۇنىنە» وراي ءبىزدىڭ اۋىلدا، قازاقتىڭ ءبىرتۋار بالۋانى قاجىمۇقان مۇڭايتپاسوۆتىڭ تۋعان جەرىندە 6 جاسار بەكمانسۇر جەڭىل اۆتوكولىكتى 20 مەتر قاشىقتىققا دەيىن تارتىپ، رەكورد ورناتتى. ءوزىنىڭ كىشكەنتاي بولعانىنا قاراماستان، بەكمانسۇر ناعىز باتىر. ول مەنى ءوزىنىڭ اعاسىنداي كورىپ، ۇنەمى جاقىن تارتىپ جۇرەدى. مەن مۇنى ماقتان تۇتامىن. استانا قالاسىندا تۇراتىن جاس باتىردىڭ العاشقى جەڭىسىنىڭ كۋاسى بولۋ مەن ءۇشىن، ءبىزدىڭ اۋىل تۇرعىندارى ءۇشىن زور مارتەبە! العا، ءىنىم! قاناتىڭ ەشقاشان تالماسىن! قاجىمۇقان اتامىزداي بالۋان بول! اللام ءوزىڭدى قولداسىن!»، - دەپ جازدى جەلى قولدانۋشىسى ءامىر ماحمەت.
ەسكە سالا كەتەيىك، وتكەن جىلى استانا قالاسىنداعى ەكسپو-2017 حالىقارالىق كورمەسى ماڭىندا قازاقستاننىڭ گيننەس رەكوردتار كىتابىندا كەۋدەنى جەردەن كوتەرۋ سپورتى بويىنشا بەس دۇركىن رەكوردشى، سونداي-اق دەنەنى ءبىرقالىپتا ۇستاۋ بويىنشا الەمدىك رەكوردسمەن اتاعىنىڭ يەگەرى ءامىر ماحمەت شولمەكتەردە 53 جاتتىعۋ جاساپ، جاڭا الەمدىك رەكورد ورناتقان بولاتىن.
