قازاقستاننىڭ اۋە كەڭىستىگىن پايدالانۋشىلار سانى 6 پايىز ءوستى
بۇل 2017-جىلدىڭ سايكەس كەزەڭىمەن سالىستىرعاندا 9522 گە ارتىق. اۋە قوزعالىسىنىڭ كولەمى 5,87 پايىزعا ارتقان، دەپ حابارلادى ق ر ينۆەستيتسيالار جانە دامۋ مينيسترلىگىنىڭ باسپا ءسوز قىزمەتى.
باسپا ءسوز مالىمەتتەرىنە قاراعاندا، جىل باسىنان بەرى قازاقستاندىق اۋە كومپانيالار 66489 رەت، ال شەتەلدىك اۋە كومپانيالار 105356 رەت ۇشقان.
اۋە قوزعالىسى كولەمىنىڭ ارتۋى قازاقستانعا قوناتىن شەت مەملەكەتتەردىڭ اۋە كەمەلەرىنىڭ چارتەرلىك رەيستەرىن قوسپاعاندا، ۇشۋدىڭ بارلىق ساناتتارى بويىنشا جانە قازاقستاندىق اۋە كومپانيالاردىڭ ىشكى چارتەرلىك رەيستەرىندە دە بايقالادى.
قازاقستاننىڭ اۋە كەڭىستىگى ارقىلى 2018-جىلدىڭ قاڭتار-تامىز ايلارىندا تۇراقتى ترانزيتتىك ۇشۋلار سانى 76431 گە جەتكەن. بۇل وتكەن جىلدىڭ سايكەس كەزەڭىمەن سالىستىرعاندا 5328 گە (7.49+ پايىز) ارتىق. شەتەلدىك اۋە كومپانيالارىنىڭ چارتەرلىك ۇشۋلارى 18,89+ پايىزدى قۇرادى (2017-جىلى 6621 رەيستەن 2018-جىلى 7872 گە دەيىن).
«ترانزيتتىك قوزعالىستىڭ ارتۋى شەتەلدىك اۋە كومپانيالاردىڭ تۇراقتى رەيستەرىنىڭ جيىلىگىنىڭ كوبەيۋىمەن بايلانىستى. قازاقستاننىڭ اۋەجايلارىنا قونعان شەتەلدىك اۋە كومپانيالاردىڭ تۇراقتى رەيستەرىنىڭ ورىندالۋ سانى 2018-جىلدىڭ قاڭتار-تامىز ايلارىندا 15221 گە جەتتى. بۇل وتكەن جىلدىڭ سايكەس كەزەڭىمەن سالىستىرعاندا 354 كە (2.38+ پايىز) ارتىق»، - دەلىنگەن حابارلامادا.
