قوستانايدا جىل سوڭىنا دەيىن 6 مىڭ كولىك قۇراستىرىلادى
بۇل تۋرالى كاسىپورىننىڭ تەحنيكالىق ديرەكتورى سەرگەي موگيلاتوۆ ءمالىم ەتتى، دەپ حابارلايدى قازاقپارات ءتىلشىسى.
ازىرگە رەسەيگە العاشقى پارتيالار سىناما رەتىندە جىبەرىلدى. تاجىكستانمەن جىل سوڭىنا دەيىن ءجۇز ماشينا ساتۋعا كەلىسىم جاسالدى. ەسكە سالساق، ءساۋىر ايىندا AllurGroup كومپانياسى «KazakhExport» ەكسپورتتىق ساقتاندىرۋ كومپانياسى مەن قازاقستاننىڭ تاجىكستانداعى ەلشىلىگىنىڭ قولداۋىمەن «حولدينگ ازيا گرۋپ تادجيكيستان» كومپانياسىمەن ەكىجاقتى كەلىسىمگە قول قويعان. وسى كەلىسىم اياسىندا 2018 -جىلدىڭ اياعىنا دەيىن تاجىك تاكسوموتورلىق پاركى قازاقستاندىق كولىكتەرمەن تولىقتىرىلادى.
«بۇگىندە اۆتونارىقتا باسەكەلەستىك جوعارى. الەمدىك الپاۋىتتارمەن يىق تىرەستىرۋ وڭاي ەمەس. كاسىپورىننىڭ حالىقارالىق ارىپتەستەرىمەن بىرلەسە قيمىلداۋىنا جەرگىلىكتى بيلىك تە قولداۋ جاساپ وتىر. جاقىندا عانا ەكى بىردەي كەلىسىمشارتقا قول قويىلدى. راس، مەملەكەتتىڭ قولداۋى كاسىپورىندى قانداي قيىن شاقتا دا قۇلدىراۋعا جىبەرگەن جوق. بۇگىندە ءوندىرىس ورنى كولىكتەردىڭ ءتۇرىن كوبەيتىپ، ونىمدەردەگى قازاقستاندىق ۇلەستى ارتتىرۋعا كوشتى. بىرتىندەپ سىرتقى نارىققا دا جول اشىلا باستادى. جوسپار بويىنشا «سارى ارقا اۆتوپروم» زاۋىتى جىل سوڭىنا دەيىن التى مىڭ دانا كولىكتى ساتىلىمعا شىعارۋعا ىنتالى»، - دەدى سەرگەي موگيلاتوۆ.
كاسىپورىن قىتاي، رەسەي، وزبەكستان سياقتى ەلدەرمەن تىعىز بايلانىستا. سوڭعى جەتى جىل ىشىندە زاۋىت 30 مىڭ اۆتوكولىك قۇراستىردى. اۆتوبۋس ءوندىرىسى 12,4 ەسەگە ارتتى. جىل باسىنان بەرى 215 «يۆەكو» ماركالى اۆتوبۋس قۇراستىرىلىپ، استانادا وتكەن «ەكسپو-2017» حالىقارالىق كورمەسىنە كەلۋشىلەردى تاسىمالداۋعا جونەلتىلدى.
بيىل «سارى ارقا اۆتوپروم» ج ش س- ءنىڭ وندىرىستىك الاڭىندا ANKAI اتتى اۆتوبۋستاردىڭ بىرلەسكەن زاۋىتى ىسكە قوسىلدى. اۆتوبۋستار «ەۋرو 5» ەكولوگيالىق تالاپتارىنا ساي كەلەدى. گازبەن دە، ديزەلدى وتىنمەن دە جۇرەدى. ايتا كەتۋ كەرەك، كولىكتەردىڭ كەيبىر بولشەكتەرى زاۋىتتا شىعارىلادى. بۇگىندە ونىڭ ۇلەس سالماعى 33 پايىزعا جەتتى.
«ماشينا شاناقتارى ءتورت دەڭگەيلى سىرلاۋدان وتەدى. زاماناۋي جابدىقتار جۇمىستى ساپالى، مۇلتىكسىز اتقارۋعا مۇمكىندىك بەرەدى. كاسىپورىندا ۇساق ءتۇيىندى قۇراستىرۋ سەحى ىسكە قوسىلعالى دانەكەرلەۋ، سىرلاۋ، قۇراۋ سياقتى جۇمىستار جوعارى ساپادا اتقارىلادى»، - دەدى تەحنيكالىق ديرەكتور سەرگەي موگيلاتوۆ.
تەحنيكالىق ديرەكتوردىڭ ايتۋىنشا، بيىل كاسىپورىن جەڭىل كولىكتەر ءوندىرىسىن 1,9 ەسەگە ارتتىرعان. سونداي- اق، 2126 جەڭىل كولىك كونۆەيەردەن شىققان. ونىڭ ىشىندە 1149 - «حيۋنداي»، 290 - «راۆون»، 283 - «دجاك»، 173 - «شيەۆرولە نيۆا»، 119 - «پەجو» جانە 19 «سسان يونگ» كولىكتەرى ساتىلىمعا شىعارىلدى. بارلىعى 41,6 ميلليارد تەڭگەنىڭ ونىمدەرى ءوندىرىلدى.
فوتو http://auto.kz
اۆتور: باتىر جولاي ۇلى
