اتا- انالارعا قۇلاققاعىس: جاڭارتىلعان ءبىلىم باعدارلاماسىنداعى ماڭىزدى 6 فاكتى

ق ر ءبىلىم جانە عىلىم مينيسترلىگىنەن ءمالىم ەتكەندەي، جاڭا باعدارلامانىڭ ماقساتى - مەكتەپ وقۋشىلارىن العان ءبىلىمىن ومىردە پايدالاناتىنداي ەتىپ وقىتۋ، دەپ حابارلايدى قازاقپارات. كوپتەگەن دامىعان ەلدەردە ءبىلىم سالاسىنداعى مۇنداي وزگەرىستەر وتكەن عاسىردىڭ سەكسەنىنشى جىلدارى ەنگىزىلە باستاعان. توقسانىنشى جىلداردىڭ ورتا شەشىندە بۇل جاڭارتۋلار اياقتالدى. قازاقستاندا جاڭارتىلعان باعدارلاماعا كوشۋ ەندى باستالدى. 2016-2017 وقۋ جىلىندا بارشا ءبىرىنشى سىنىپ وقۋشىلارى وسى باعدارلاماعا كوشتى. بيىل 1 - قىركۇيەكتەن باستاپ ەكىنشى، بەسىنشى جانە جەتىنشى سىنىپ وقۋشىلارى جاڭا باعدارلامامەن وقي باستادى. مۇنىمەن قاتار، 2017-2018 - وقۋ جىلىندا 30 مەكتەپتە سىناق رەتىندە ءۇشىنشى سىنىپ وقۋشىلارى جاڭارتىلعان باعدارلامانى باستادى. ءبىلىم بەرۋ سالاسىنىڭ كەزەڭ- كەزەڭمەن جاڭارۋى 4 جىلعا سوزىلادى. 2018-2019 وقۋ جىلىندا 3, 6, 8 جانە 10- سىنىپتارعا كەزەك كەلەدى. 2019-2020 -جىلى 4, 9, 11- سىنىپتار كوشەدى.
ازىرگە كوپتەگەن وقۋشىلار مەن اتا- انالار بۇل ماڭىزدى ءىستىڭ ءمانىن جەتە ۇعىنا قويعان جوق. ەندەشە، ءبىلىم جانە عىلىم مينيسترلىگى ۇسىنعان مالىمەت بويىنشا 2017-2018 وقۋ جىلى جاڭالىق بولاتىن ماڭىزدى 6 وزگەرىستى قىسقاشا ءتۇسىندىرىپ وتسەك.
2017-2018 جىلدىڭ وقۋ باعدارلاماسى
2016-2017 -جىلى ءبىرىنشى سىنىپ ءۇشىن ەنگىزىلگەن جاڭا وقۋ باعدارلاماسى «نازاربايەۆ زياتكەرلىك مەكتەپتەرىندەگى» وقىتۋ تاجىريبەسىنە نەگىزدەلگەن بولاتىن. بيىلعى وقۋ جىلىندا ەكىنشى، بەسىنشى جانە جەتىنشى سىنىپتار ءۇشىن جاڭارتىلعان وقۋ باعدارلاماسى دايىندالىپ، ەنگىزىلدى. 2017-2018 وقۋ جىلىنداعى باعدارلامادا بۇرىنعى پاندەر تولىقتاي قالادى. ەشقايسىسىنا وزگەرىس ەنگىزىلگەن جوق. وقۋ جوسپارىندا دا قانداي دا ءبىر جاڭالىق جوق. دەگەنمەن، مەكتەپتە وقىتۋعا رۇقسات بەرىلگەن قوسىمشا ادەبيەتتىڭ قاتارى كوبەيگەن. كريتەريالدى باعالاۋ جۇيەسى
جاڭارتىلعان ءبىلىم باعدارلاماسىمەن وقيتىن سىنىپتاردا باعالاۋدىڭ جاڭا جۇيەسى ەنگىزىلدى. ول - كريتەريالدى باعالاۋ جۇيەسى (https://goo.gl/GshZsD) . ول بويىنشا الدىن الا بەلگىلەنگەن، ناقتى ولشەم بويىنشا باعا قويىلادى. بۇل ادىستەمە وقۋشىلاردىڭ ءبىلىمى مەن داعدىسىن ساپالى دا ءادىل سارالاۋعا مۇمكىندىك بەرەدى. مۇنىمەن قاتار، بۇل جۇيە بالالاردىڭ ءوز جۇمىسىن بايىپپەن باعالاپ، باقىلاۋىنا جانە ءوز قاتەسىن ءوزى تاۋىپ، كەلەسىدە قايتالامايتىنداي ەتىپ كوڭىلىنە ءتۇيىپ الۋىنا ىڭعايلى. كريتەريالدى باعالاۋ جۇيەسى قالىپتاستىرۋشى جانە جيىنتىق باعالاۋ بولىپ ەكىگە بولىنەدى. قالىپتاستىرۋشى باعالاۋ وقۋشىنىڭ نە ۇيرەنگەنىن انىقتايدى. ءار كەزەڭ سايىن الىناتىن بۇل سىناق توقساندىق جانە جىلدىق قورىتىندىعا اسەر ەتەدى. جيىنتىق باعالاۋ وقۋ ماتەريالىنىڭ بەلگىلى ءبىر كەزەڭىن اياقتاعان سوڭ سول ءبولىمنىڭ قورىتىندىسىن باعالاپ، قورىتىندى بالىن شىعارادى.
ءۇش تىلدىلىككە بىرتىندەپ ءوتۋ
1 - قىركۇيەكتەن باستاپ 799 مەكتەپتە جاراتىلىستانۋ باعىتىنداعى بەلگىلى ءبىر پاندەر اعىلشىن تىلىندە وقىتىلا باستايدى. بۇل وقۋشىلاردىڭ ۇيرەنىپ جۇرگەن شەت ءتىلىن پىسىقتاۋ بولىپ تا سانالادى. فيزيكا، بيولوگيا، گەوگرافيا، حيميا جانە باسقا دا پاندەردى اعىلشىن تىلىندە وقىتۋدى بيىل شامامەن 160 مىڭ بالا پيلوتتى رەجيمدە باستايدى. ءۇش تىلدىلىككە بىرتىندەپ كوشۋ ءۇشىن ءبىزدىڭ مينيسترلىك ءپان مۇعالىمدەرىنىڭ ءتىل ۇيرەنۋىن جەدەلدەتىپ جاتىر. مۇعالىمدەر اعىلشىن تىلىندە جاقسى ءتۇسىنىسىپ، ءتىل سىندىرىپ قانا قويماي، ءوز ءپانىن سول تىلدە ەركىن تۇسىندىرە الاتىن دا بولۋى كەرەك. قازىرگى كەزدە مىڭنان استام ءمۇعالىم تىلدىك كۋرستارعا بارىپ، ءتيىستى سەرتيفيكاتتارىن الدى.
بەسكۇندىك وقۋ اپتاسى
جاڭارتىلعان باعدارلاماعا كوشكەن سىنىپتار اپتاسىنا بەس كۇن وقيتىن بولادى. بەسكۇندىك وقۋ جۇيەسىنە كوشۋ ءبىلىم ساپاسىنا اسەرىن تيگىزبەۋى كەرەك. ءار پانگە التى كۇندىك باعدارلاماداعى سياقتى ساعاتتار بولىنەدى. تەك اپتاسىنا بەس كۇن وقي باستاعاندا بالالاردىڭ بوس ۋاقىتى كوبەيەدى. ال پەداگوگتاردا ءوز بىلىكتىلىگىن كوتەرۋ ءۇشىن دەمالىس كۇن پايدا بولادى. ەندى سەنبى سايىن ءپان مۇعالىمدەرى سپورتتىق ويىن تۇرلەرىنەن جارىس وتكىزىپ، دايىندىق كۋرسى، ۇيىرمە، ستۋديا سەكىلدى قوسىمشا شارالار ۇيىمداستىرا الادى. بۇل كۇندەرى مەكتەپتە بالالاردىڭ قىزىعۋشىلىعىنا قاراي سپورتتىق، تانىمدىق جارىستار، بايقاۋ، ويىن- ساۋىق باعدارلامالارى، ەكسكۋرسيالار سەكىلدى كوپتەگەن پايدالى دۇنيەلەرمەن اينالىسۋعا بولادى. بەس كۇندىك وقۋ اپتاسىنىڭ ارتىقشىلىقتارى تۋرالى مىنا سىلتەمەگە ءوتىپ تانىسۋعا بولادى: https://goo.gl/iZyS7j
ءۇي تاپسىرماسى ازايادى
جاڭا باعدارلاما بويىنشا ءبىلىم الىپ جاتقان مەكتەپ وقۋشىلارى ءۇشىن ءۇي تاپسىرماسىنىڭ كولەمى ازايادى. شامامەن، بالالار ءۇي تاپسىرماسىنا ادەتتەگى ۋاقىتتىڭ ۇشتەن ءبىرىن كەم جۇمسايتىن بولدى. جاڭا نورماتيۆ بويىنشا ەكىنشى سىنىپتا ءۇي تاپسىرماسىن ورىنداۋعا كۇنىنە 50 مينۋت، 3-4 سىنىپتاردا - 70 مينۋت، 5-6 سىنىپتاردا - 90 مينۋت، 7-9 سىنىپتاردا - 110 مينۋت، 10-11 (12) سىنىپتاردا 130 مينۋت جۇمسالادى. مەرەكە مەن دەمالىس كۇندەرىنە تاپسىرما بەرىلمەيدى. بۇل ۋاقىتتا تەك جوبالىق جۇمىستارى بار، ماتەماتيكانى تەرەڭدەتىپ وقيتىن بالالاردىڭ تاپسىرماسى مەن جالپى تانىم ءۇشىن كوركەم ادەبيەت وقۋ عانا قالادى. ءبىرىنشى سىنىپتاعىلارعا ۇيدە وكۋدى تەك ەكىنشى توقساننان باستاپ مىندەتتەيدى. بولاشاقتا جوعارى سىنىپتاردا ءار ساباقتان بەرىلەتىن كۇندەلىكتى تاپسىرمانىڭ ورنىن ءار توقسانعا بەرىلەتىن تاپسىرمالار الماستىرادى دەگەن جوسپار بار.
قورىتىندى اتتەستاتسيا تاپسىرۋ ءتارتىبى
بيىلعى وقۋ جىلىنىڭ سوڭىنداعى قورىتىندى اتتەستاتسيا تاپسىرۋ تارتىبىنە وزگەرىس ەنگەن جوق. ەستەرىڭىزدە بولسا، 2017 -جىلى 11-سىنىپ بىتىرۋشىلەر مەن «التىن بەلگى» يەگەرلەرىنىڭ اتتەستاتسياسى مەكتەپتەگى ءبىتىرۋ ەمتيحانى تۇرىندە بەس پاننەن وتكەن بولاتىن.