جۇكتى ايەلدەر مەملەكەتتەن 6 ميلليون تەڭگە جىمقىردى
قارجى مينيسترلىگى مەملەكەتتىك كىرىستەر كوميتەتىنىڭ باسپا ءسوز قىزمەتىنەن ءمالىم ەتكەندەي، بۇل جولعى قىلمىس جۇكتىلىك پەن بوسانۋعا بايلانىستى بەرىلەتىن الەۋمەتتىك تولەمدەرگە قاتىستى.
مەملەكەت قازىناسىنان 6 ميلليون 162 مىڭ تەڭگەنى جىمقىرعان قىلمىستىق توپ ايەلدەردەن قۇرالعان. اتاپ ايتقاندا، «مەملەكەتتىك الەۋمەتتىك ساقتاندىرۋ قورى» ا ق- نىڭ قىزىلوردا فيليالىنىڭ قىزمەتكەرلەرى جانە دارا كاسىپكەر بىرىگىپ ارەكەت ەتكەن.
قور وكىلدەرى - الەۋمەتتىك تولەمدەردى ۆەدومستۆوارالىق تولەۋ ورتالىعىنىڭ قىزمەتكەرلەرى د. ب. مەن ا. ا. 2016 -جىلدىڭ قاڭتار- ءساۋىر ارالىعىندا قىزىلوردا قالاسىندا تۇراتىن جۇمىس ىستەمەيتىن ون جۇكتى ايەلدى تاۋىپ، ولارعا قاجەتتى قۇجاتتاردى جيناقتاعان. ال كاسىپكەر ا. س. ءوزىنىڭ جانە كۇيەۋىنىڭ اتىنا تىركەلگەن «سماگۋلوۆا» جانە «تاجبەنبەتوۆ» جەكە كاسىپكەرلىكتەرىنەن ول ايەلدەرگە جالدامالى جۇمىسشىسى رەتىندە الەۋمەتتىك تولەمدەر «اۋدارىپ وتىرعان».
مۇقيات دايىندالعان كەلىسىم بويىنشا، جەكە كاسىپكەردىڭ وتكىزگەن جالعان قۇجاتتارى نەگىزىندە، قور قىزمەتكەرلەرى ەش كەدەرگىسىز جاردەماقى تاعايىنداۋ تۋرالى شەشىم شىعارىپ وتىرعان.
الايدا، قىلمىس انىقتالدى. قىزىلوردا وبلىسى بويىنشا م ك د ە ت ق- ى قازاقستان رەسپۋبليكاسى قىلمىستىق كودەكسىنىڭ 190-بابى، 4-بولىگىنىڭ 2-تارماعىمەن جانە 385-بابى 1,2-بولىكتەرىمەن قىلمىستىق ءىس جۇرگىزىپ، قىلمىستىق جۇيەنى تولىعىمەن اشتى.
قىزىلوردا قالالىق №2-سوتىنىڭ اعىمداعى جىلدىڭ 7 -قىركۇيەگىندەگى شەشىمىمەن بارلىق قاتىسۋشىلاردىڭ كىناسى دالەلدەنىپ، ءتيىستى جازا تاعايىندالدى. ءارقايسىسى 3 جىلدان باس بوستاندىعىنان ايرىلدى، الايدا كىشكەنتاي بالالارىنىڭ بولۋىنا بايلانىستى جازانى وتەۋ كەيىنگە قالدىرىلدى.
