اقتاۋدا جۇرەگىندە اقاۋى بار 6 ايلىق سابيگە وتا جاسالدى

استانا. قازاقپارات - ماڭعىستاۋ وبلىستىق اۋرۋحاناسىنىڭ كارديوورتالىعىنىڭ دارىگەرلەرى 6 ايلىق تالعاتتىڭ جۇرەگىنە ءساتتى وتا جاسادى، دەپ حابارلايدى قازاقپاراتتىڭ وڭىردەگى ءتىلشىسى.

  ءسابيدىڭ تۋا بىتكەن جۇرەك اقاۋى بار ەكەندىگىن اتا- اناسى ول 6 ايعا تولعاندا عانا ءبىلىپ، جەدەل دابىل قاققان. وسىدان كەيىن وعان شۇعىل ارادا وتا جاسالدى. دارىگەرلەر سابيگە وپەراتسيانىڭ دەر ۋاقىتىندا جاسالعاندىعىن ايتۋدا.

 «وتباسى جاڭاوزەننەن. بالاعا دۇنيەگە كەلگەننەن دياگنوز قويىلماعان، ءجيى سۋىق ءتيىپ اۋىرعان. ونىڭ بويى وسپەگەن، سالماق تا قوسپاعان. اتا- انالار قاۋىپتەنىپ، 6 ايلىق بالالارىن بىزگە العاش رەت دياگنوستيكاعا اكەلىپ وتىر. جۇرەگىنە ۋلترادىبىستىق زەرتتەۋ جۇرگىزگەننەن كەيىن جۇرەك ارالىق پەردەنىڭ ايقىن دەفەكتىسى، ءانومالدى درەناج كۇدىگى دياگنوزىن قويدى. كۇدىگىمىز وتا بارىسىندا دۇرىس بولىپ شىقتى.

 توتالدى انومالدى درەناج اۋىر، كۇردەلى تۋا بىتكەن جۇرەك اقاۋى سانالادى جانە 100 پايىزدىق حيرۋرگيالىق ارالاسۋدى تالاپ ەتەدى. بالالارعا دۇنيەگە كەلگەن العاشقى كۇندەرىندە، ءبىرىنشى، ەكىنشى اپتادا وتا جاسالادى. ەگەر وتا وسى مەرزىمدە جاسالماسا وندا جوعارى وكپە گيپەرتەنزياسى داميدى. سونىڭ سالدارىنان ستاتيستيكاعا سايكەس سابيلەردىڭ 90 پايىزى 6 ايعا تولماي شەتىنەپ كەتەدى. قالعان 10 پايىزى 1 جاسقا، 3 جاسقا دەيىن ءومىر سۇرەدى»، - دەدى كارديوورتالىقتىڭ جەتەكشىسى جەڭىس قوزىبايەۆ.

ونىڭ سوزىنە قاراعاندا، وتا ءساتتى ءوتتى. ءسابيدىڭ جاعدايى وتە اۋىر بولعان. ول 5 تاۋلىك بويى رەانيماتسيادا جاتقان. بۇگىن پاتسيەنتكە ەكستۋباتسيا جۇرگىزىلىپ، وكپەگە اۋا بەرۋ اپپاراتىنان شىعارىلدى.

اۆتور: مارلان جيەمباي