ق ر ۇلتتىق ەكونوميكا ءمينيسترى 6 ايدا انا ءتىلىن ۇيرەنە الا ما

استانا. قازاقپارات - پارلامەنت ءماجىلىسىنىڭ جالپى وتىرىسى بارىسىندا تىلشىلەر ساۋالىنا جاۋاپ بەرگەن ق ر ۇلتتىق ەكونوميكا ءمينيسترى تيمۋر سۇلەيمەنوۆ تاياۋ ۋاقىتتا قازاق تىلىندە جەتىك سويلەيتىنىن ايتتى،

 دەپ حابارلايدى قازاقپارات.

 اتاپ ايتقاندا، جالپى وتىرىس كەزىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەرگىلىكتى ءوزىن- ءوزى باسقارۋدى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى اياسىندا دەپۋتاتتاردىڭ قازاق تىلىندە قويعان سۇراقتارىنا مينيستر تەك ورىسشا جاۋاپ بەرىپ وتىردى.

جاڭادان تاعايىندالعان مينيستر جۋرناليستەرگە سۇحباتى بارىسىندا ماسكەۋدە جۇمىس ىستەگەن جىلدار ىشىندە قازاق ءتىلىن ۇمىتىڭقىراعانىن جەتكىزدى.

«ماسكەۋدە 5 جىلعى قىزمەتىم بارىسىندا ءوز انا ءتىلىمدى ۇمىتىپپىن. ءبىراق تا، التى ايدىڭ ىشىندە قايتا مەڭگەرىپ شىعامىن»، - دەدى سۇلەيمەنوۆ.

سونىمەن قاتار ول قىزمەتىندە جاقسى ءارى جاۋاپكەرشىلىكپەن جۇمىس ىستەيتىنىن، وسى ورايدا باسشىلىقتىڭ بەرگەن تاپسىرمالارىن ورىنداپ، قىزمەتكەرلەرگە، قوعامعا، ازاماتتارعا قاتىستى ادال بولاتىنىن اتاپ ءوتتى. «بۇل ۇستانىمداردى ورىنداعان جاعدايدا ماقساتتار جۇزەگە اسادى دەگەن ويدامىن»، - دەپ جاۋاپ قايىردى مينيستر.

 اۆتور: رۋسلان عابباسوۆ