استانادا 6 مىڭعا جۋىق بولاشاق «سارباز» ىزدەستىرىلۋدە

استانا. قازاقپارات - قازاقستاندا اسكەرگە بارۋدان بوي تاسالايتىن جاستار سانى از ەمەس.

 استانانىڭ وزىندە 6 مىڭعا جۋىق شاقىرىلۋشى ءتيىستى مەكەن جايىنان تابىلماي، سالا ماماندارىن سەرگەلدەڭگە سالىپ وتىر.

وسى كۇنى وتان قورعاۋدان جالتارىپ جۇرگەندەر مەملەكەتكە ايىپپۇل تۇرىندە 19 ميلليون تەڭگە قارىز. جاستارى 18-دەن اسسا دا، اسكەرگە بارۋعا اسىقپاي جۇرگەن جەتكىنشەكتەر جەتەرلىك. باسىم بولىگى سان ءتۇرلى سىلتاۋ ايتىپ، شاقىرتۋ قاعازدارىن جاۋاپسىز قالدىرادى.

استانا قالالىق قورعانىس ىستەرى جونىندەگى دەپارتامەنتتىڭ ءبولىم سەرجانتى جاسۇلان اسىلبەكوۆتىڭ ايتۋىنشا، اسكەرگە شاقىرۋ ناۋقانى باستالعاندا، ولار ءۇي- ءۇيدى ارالاپ، شاقىرتۋ قاعازدارىن تاراتادى. ءبىراق 10 شاقىرتۋ قاعازىنىڭ ەكەۋى عانا يەسىنە جەتەدى. سەبەبى جاستاردىڭ دەنى مەكەن جايلارىن اۋىستىرىپ، ول تۋرالى اسكەري شاقىرۋ كوميسسياسىنا ەسكەرتپەيدى.

جالپى ەلورداداعى اسكەرگە شاقىرىلۋشىلاردىڭ 60 پايىزى ءتيىستى مەكەن جايلارىندا تۇرمايدى. سوندىقتان قوعامدىق ورىنداردا كەز كەلگەن جەتكىنشەكتىڭ قۇجاتى تەكسەرىلىپ، 18 جاستان اسقاندارى جيناقتاۋ پۋنكتتەرىنە جىبەرىلىپ جاتىر. ال اسكەرگە بارۋدان باس تارتقاندارى اۋقىمدى ايىپپۇل تولەۋگە مىندەتتەلەدى. جىل باسىنان بەرى وسىنداي 2 مىڭ دەرەك تىركەلدى.

 دەرەككوزى: «حابار24» ارناسى.