اقتوبەدە اتا-اناسىز تۇرىپ كەلگەن 6 بالاعا ەرىكتىلەر ءۇي تۇرعىزىپ جاتىر

استانا. قازاقپارات - اقتوبەدە قۇرىلىسى بىتپەگەن ساياجايلاردىڭ بىرىندە اتا-اناسىز تۇرىپ كەلگەن التى بالاعا ەرىكتى ازاماتتار اسار ۇيىمداستىردى.

بۇل تۋرالى «قازاقپارات» تىلشىسىنە ەرىكتىلەردىڭ ءبىرى البينا بايانعالي ءمالىم ەتتى.

ەرىكتىلەر قازىرگى ۋاقىتتا شىنىبەكوۆتەر جانۇياسىنىڭ بىتپەگەن ءۇيىن جوندەۋگە كىرىسكەن. وسى ارالىقتا ولارعا 300 گە تارتا ەرىكتى كومەك كورسەتىپ ۇلگەردى.

«ءۇش تاۋلىك بويى ءبىز مۇمكىندىگىنشە بالالارمەن بىرگە بولدىق. ءبىز ەڭ ۇلكەن قىزىنىڭ اتىنان بانك رەكۆيزيتتەرىن اشتىق، ول 18 گە تولدى، بارلىق رەكۆيزيتتەر جالعان ەمەس، بانك ەسەپشوتى ونىڭ اتىنان اشىلعانى راس. بۇل قاراجات بالالاردىڭ ارى قاراي ءومىر سۇرۋىنە قاجەت بولادى دەگەن نيەتپەن وسى ەسەپشوتتى اشتىق»، - دەيدى ا. بايانعالي.

ونىڭ ايتۋىنشا، اقتوبە جانە ايماق اكىمدىگى دە اتالمىش جەتكىنشەكتەرگە كومەك قولىن ايانباي قوسىپ كەلەدى.

«قالا اكىمىنىڭ ورىنباسارى كەلدى، وبلىستان قۇزىرلى ورگاندار كەلدى. جەرگىلىكتى ورگانمەن ءبىز تىعىز جۇمىس جاساپ جاتىرمىز. ولار ۇلكەن قىزدارىنىڭ كوللەدجدەگى وقۋ اقىسىمەن ماسەلەنى شەشىپ بەردى. ول سوڭعى كۋرستا وقيدى جانە ول ونى تەگىن وقىماق. ەكى بالا بالاباقشاعا ورنالاستىرىلدى. ۇيگە گاز تارتۋ بويىنشا قۇجاتتارمەن قاراپايىم ادامدار اينالىسىپ جاتىر»، - دەيدى ەرىكتىلەر شتابىنىڭ جەتەكشىلەرىنىڭ ءبىرى.

ونىڭ سوزىنشە، ءۇي قۇرىلىسى اياقتالعانشا، بالالار ۋاقىتشا جالدامالى ۇيگە جايعاستىرىلعان. ولار تاماقپەن جانە كيىممەن تولىق قامتىلدى.

«پاتەردى ءبىر ايعا، قۇرىلىس بىتكەنشە جالدادىق. ءۇيدى جوندەۋ جۇمىستارىن قاراپايىم ازاماتتار جاساپ جاتىر. قۇرىلىس ماتەريالدارىن ساتاتىن جەرگىلىكتى دۇكەن قۇرىلىس ماتەريالدارىمەن قامتۋدا. ءۇش تاۋلىكتە كومەك قولىن سوزعان ازاماتتار وتە كوپ بولدى. شامامەن 300 گە تارتا ادام كەلدى، ءبىرى ازىق-تۇلىكپەن، ءبىرى ەتپەن قامتۋعا تىرىستى»، - دەپ اتاپ ءوتتى ا. بايانعالي.

اۆتور: جاسۇلان جولدىبايەۆ