قازاق دزيۋدوشىلارى 6 -وليمپيادادا قانشا مەدال جەڭىپ الدى؟

ريودا سونىڭ ەكەۋى جۇلدەگە ىلىكتى. وليمپيادانىڭ العاشقى كۇنى 60 كەلىگە دەيىنگى سالماقتا ەلدوس سمەتوۆ كۇمىس جۇلدەنى ەنشىلەسە، ايەلدەر اراسىنداعى 48 كەلىگە دەيىنگى سالماقتا گالبادراح وتگونسەسەگ قورجىنىمىزعا قولا مەدال سالدى. وليمپيادا ويىندارىندا سپورتتىڭ ءبىر تۇرىنەن 6 سپورتشى قاتىسىپ، ەكى مەدال جەڭىپ الۋ جامان كورسەتكىش ەمەس.
نەگىزى، وليمپيادا ويىندارىنا دزيۋدودان ءار مەملەكەت 14 سپورتشىدان (7 ەر، 7 ايەل) الىپ بارۋىنا مۇمكىندىگى بار. دەگەنمەن، قازاقستان ءۇشىن ريوداعى دوداعا بۇيىرعانى 6 جولداما بولدى. وسىعان دەيىنگى وليمپيادا ويىندارىمەن سالىستىرا قاراعاندا، ازداۋ ەكەنى بەلگىلى.
ايتالىق، تاۋەلسىزدىك العاننان بەرى 1996, 2000 جانە 2004 -جىلعى وليمپيادالارعا دزيۋدودان 8 سپورتشىدان، 2008 -جىلى بەيجىڭدە وتكەن دوداعا 10 سپورتشى، 2012 -جىلى لوندونعا 9 سپورتشى باردى. بيىل ەسەپ بويىنشا التىنشى وليمپياداعا ەڭ از التى سپورتشى قاتىستى. بيىل ەڭ از سپورتشى قاتىسا تۇرا تاتامي شەبەرلەرى ەكى جۇلدە جەڭىپ الدى.
ال وسىعان دەيىنگى بەس وليمپيادادا ويىندارىنا قانشا كوپ سپورتشى بارسا دا، جالعىز مەدالعا قول جەتكىزىپتى. ول - 2008 -جىلى بەيجىڭدە وتكەن دودادا جەڭىپ العان اسحات جىتكەيەۆتىڭ كۇمىس جۇلدەسى.
سوندا قازاق ەلىنىڭ دزيۋدوشىلارى ريونى قوسقاندا التى وليمپيادادان نە ءبارى 2 كۇمىس، 1 قولا، جالپى 3 مەدال جەڭىپ الىپتى. بۇل قازاق سپورتشىلارى ءۇشىن از با، كوپ پە؟.. ەڭ باستىسى، ءوتىپ جاتقان ريو وليمپياداسى قازاق دزيۋدوشىلارى ءۇشىن وتە ءساتتى اياقتالدى.
اۆتور: كۇنسۇلتان وتارباي