ازيا بالالارى 6- حالىقارالىق ويىندارىندا وتانداستارىمىز ءۇشىنشى ورىندى يەلەندى

استانا. قازاقپارات - رەسەيدىڭ ياكۋتيا ايماعىندا ۇيىمداستىرىلعان «ازيا بالالارى» VI حالىقارالىق ويىندار ءوز مارەسىنە جەتتى.

بۇل دوداعا سارىقۇرلىقتىڭ 46 ەلىنەن جينالعان 2841 بالدىرعان سپورتشىلار 22 سپورت تۇرىنەن ءوزارا مىقتىنى انىقتادى.

اتالعان سىندا قازاقستاننىڭ جاس سپورتشىلارى باسكەتبول، بوكس، ۆولەيبول، دزيۋدو، كۇرەس، جەڭىل اتلەتيكا، ماس-رەستلينگ، ۇستەل تەننيسى، پاۋەرليفتينگ، ءجۇزۋ، نىسانا كوزدەۋ، سامبو، ەركىن كۇرەس، ساداق اتۋ، تحەكۆوندو، فۋتبول، حاپساگاي، كوركەم گيمناستيكا، شاحمات، دويبى جانە ت. ب. سپورت تۇرلەرىنەن ونەر كورسەتىپ، 25 التىن، 28 كۇمىس، 36 قولا مەدال جەڭىپ الىپ، كوماندالىق ەسەپتە ۇزدىك ۇشتىكتەن كورىندى.

49 التىن، 29 كۇمىس، 36 قولا مەدال ەنشىلەگەن ءسىبىر فەدەرالدىق وكرۋگىنىڭ جاس سپورتشىلارى جەڭىپ الدى باس جۇلدەگە يەلىك ەتتى. ەكىنشى ورىندى 27 التىن، 34 كۇمىس، 36 قولا مەدال ۇتىپ العان ساحا رەسپۋبليكاسىنىڭ كومانداسى قانجىعاسىنا بايلادى. ەندى كەلەسى، ياعني VII « ازيا بالالارى» ويىندارى 2020 -جىلى موڭعوليادا وتەدى. وسى شارانىڭ سالتاناتتى جابىلۋ راسىمىندە ويىننىڭ رەسمي تۋىن ستاديوندا موڭعوليانىڭ باتىرى، بوكستان الەم چەمپيونى، وليمپيادا ويىندارىنىڭ كۇمىس جۇلدەگەرى پۋرەۆدورجيين سەردامبا قابىلداپ الدى.

اۆتور: كۇنسۇلتان وتارباي