بەيجىڭ وليمپياداسىنا قاتىسقان تاعى 6 قازاقستاندىق سپورتشىدان دوپينگ تابىلدى
اتالعان مالىمەتتە «قازاقستاننىڭ ۇلتتىق وليمپيادالىق كوميتەتى قازاقستاندىق سپورتشىلاردىڭ «ب» دوپينگ سىنامالارىنىڭ قوسىمشا تەكسەرىلۋ پروتسەدۋراسىن راستايدى» دەپ كورسەتىلگەن.
قازاقستان رەسپۋبليكاسىنىڭ ۇلتتىق وليمپيادالىق كوميتەتى (ق ر ۇ و ك) حالىقارالىق وليمپيادالىق كوميتەتىنىڭ حابارلاۋىنشا، «ا» دوپينگ سىنامالارى قايتا تەكسەرۋدەن وتكىزىلگەن سپورتشىلاردىڭ اراسىندا 2008-جىلى بەيجىڭ وليمپياداسىنا قاتىسقان التى قازاقستاندىق سپورتشىنىڭ سىناماسى كۇدىك تۋدىرعان. قازىرگى تاڭدا «ب» دوپينگ سىنامالارى حالىقارالىق وليمپيادالىق كوميتەتى مەن بۇكىل الەمدىك دوپينگكە قارسى اگەنتتىكتىڭ (WADA) پروتسەدۋرالارىنا ساي قوسىمشا تەكسەرىلىپ جاتىر.
شىلدەنىڭ 18-26 ارالىعىندا لوزاننا (شۆەيتساريا) قالاسىندا ق ر ۇ و ك وكىلدەرىنىڭ قاتىسۋىمەن «ب» دوپينگ سىنامالارىن اشۋ جانە تەكسەرۋ پروتسەدۋرالارى وتەدى. قازىر حالىقارالىق وليمپيادالىق كوميتەتىنىڭ رەگلامەنتىنە سايكەس اتالمىش پروتسەدۋرا قۇپيا جانە تەستىلەۋدىڭ تۇپكىلىكتى ناتيجەسى الىنباعانعا دەيىن اقپارات جاريالانبايدى. قايتا تەستىلەۋ پروتسەدۋرالارى اياقتالىپ، تەكسەرۋلەردىڭ رەسمي ناتيجەلەرى مەن حابارلاندىرۋ كەلگەن كەزدە عانا ۇلتتىق وليمپيادالىق كوميتەت وسى ماسەلە بويىنشا تۇسىنىكتەمە بەرۋگە ۋاكىلەتتى بولادى.
ەستەرىڭىزگە سالا كەتەيىك، وسىعان دەيىن حالىقارالىق اۋىر اتلەتيكا فەدەراتسياسى (IWF) قازاقستاندىق اۋىر اتلەت يليا يليننىڭ بەيجىڭ مەن لوندون وليمپيادالارى كەزىندە الىنعان سىنامالارىنان دوپينگ تابىلعانىن مالىمدەگەن. لوندوندا التىن العان قازاق سپورتشىلارى زۇلفيا چينشانلو، مايا مانەزا مەن سۆەتلانا پودوبەدوۆانىڭ دا سىنامالارى وڭ ناتيجە بەرگەن. ولار ۋاقىتشا جارىستاردان شەتتەتىلگەن.
اۆتور: كۇنسۇلتان وتارباي