باتىس قازاقستاندا بەلگىسىز اۋرۋدان 6 ءىرى قارا مال ولگەن
اۋىرعان مال سانى 30 باس، دەپ حابارلايدى 24.kz.
اۋداندىق باس ۆەتەريناردىڭ ايتۋىنشا، نەفتەبازا اۋىلىندا مالدىڭ اۋىرعانى تۋرالى اقپارات ماۋسىمنىڭ 17 كۇنى تۇسكەن. مالدان الىنعان سىنامالار دەرەۋ وبلىستىق زەرتحاناعا جونەلتىلدى. ازىرگە ونىڭ قورىتىندىسى شىققان جوق. دەگەنمەن، اۋىل شارۋاشىلىعى مينيسترلىگى ۆەتەرينارلىق باقىلاۋ جانە قاداعالاۋ كوميتەتىنىڭ وبلىستىق اۋماقتىق ينسپەكتسياسىنىڭ باسشىسى تەمىرحان قوناقبايەۆتىڭ ايتۋىنشا، مال پاستەرەللەز اۋرۋىنا شالدىعۋى مۇمكىن. ناقتى دياگنوزى كەلەسى اپتادا انىقتالادى. ازىرگە ۆەتەرينارلار بۇل اۋىلداردان ەت پەن ءسۇت ونىمدەرىن شىعارۋعا تىيىم سالدى.
«ءبىر بۇزاۋ ءولدى. قورانىڭ ىشىندە سۋدى ىشە المادى. ءارقايسىسىنا شەلەكپەن اپارادى. اۋىزدارىنان اپپاق كوپىرىك شىعا باستادى. بىردەن تەمپەراتۋرا، ءىشى قابىسىپ، تاماق ىشە الماي، اۋىزدارى تولعان جارا، سونىڭ ءبارىن شايىپ، بالەن كۇن ەمدەدى عوي»، - دەيدى نەفتەبازا اۋىلىنىڭ تۇرعىنى قالۋەت وماروۆا.
«بەلگىسىز اۋرۋ بولعاننان كەيىن حالىققا ەسكەرتتىك، اۋرۋدى انىقتاعانشا ەتىن، ءسۇتىن ىشپەۋگە شاقىردىق. مال دارىگەرلەرى كۇندەلىكتى ارالاپ جاتىر، تاڭەرتەڭ جانە كەشتە مالدى قاراپ جاتىر. ساۋ مالدارعا رۇقسات بەرىلەدى دە، اۋرۋ مالدارىنا جاڭاعىداي ەسكەرتۋ بەرىلدى. ءبىز شوپتەن ۋلانۋى مۇمكىن دەپ كۇدىكتەنىپ وتىرمىز. باسقا زەرتتەۋلەر ازىرگە ناتيجە بەرگەن جوق»، - دەپ مالىمدەدى اقجايىق اۋداندىق ۆەتەريناريا ءبولىمىنىڭ باسشىسى ماقتاۋعالي نۇراليەۆ.