16:29, 18 - مامىر 2016 | GMT +5
پاۆلوداردا 6 مىڭعا جۋىق ادام قازاق ءتىلىن ءبىلۋ بويىنشا ساۋاتتىلىعىن تەكسەرۋگە قاتىستى - فوتو
پاۆلودار. قازاقپارات - پاۆلودار وبلىسىندا 6 مىڭعا جۋىق ادام قازاق ءتىلىن ءبىلۋ بويىنشا جەكە ساۋاتتىلىعىن تەكسەردى.
«پاۆلوداردا ديكتانت دوستىق ءۇيىنىڭ ءماجىلىس زالىندا ءوتتى، مۇندا ەتنومادەني بىرلەستىكتەردىڭ جۇزگە جۋىق مۇشەسى، وبلىستىق قازاقستان حالقى اسسامبلەياسىنىڭ بەلسەندىلەرى جينالدى. جالپىقازاقستاندىق اكتسياعا بەلسەندى ازاماتتىق جانە ومىرلىك پوزيتسيانى ۇستانعان پاۆلودارلىقتار قاتىستى. ديكتانت نەگىزىنە «ماڭگىلىك ەل» پاتريوتتىق قۇجاتتىڭ ءماتىنى سالىنعان»، - دەپ حابارلادى دوستىق ۇيىندەگى مەديا- ورتالىقتىڭ باسشىسى ماقسات ايتپايەۆ.
بۇدان باسقا، ديكتانتتى پاۆلودارداعى مەملەكەتتىك قىزمەتكەرلەردى قايتا دايارلاۋ جانە كاسىبيلىگىن ارتتىرۋ ايماقتىق ورتالىعىندا، سونداي- اق قالاداعى كوپتەگەن جوعارى وقۋ ورىندارىندا، كىتاپحانالاردا، قالا جانە اۋدان مەكتەپتەرىندە دە جازدى.
ديكتانت قورىتىندىلارى 23 -مامىر كۇنى جاريالانادى.
