20:28, 02 - اقپان 2016 | GMT +5
شىمكەنتتە كران جۇرگىزۋشىسى 6 كولىكتى سوقتى - فوتو
شىمكەنت. قازاقپارات - شىمكەنتتەگى تەمىرلان تاس جولى بويىندا ءىرى جول- كولىك وقيعاسى تىركەلدى.
سونىڭ سالدارىنان جول ۇستىندە كەپتەلىس پايدا بولىپ، كولىك جۇرگىزۋشىلەرى ساعاتتاپ بوگەلدى.
مۇندا جۇك كوتەرەتىن كران 6 بىردەي كولىكتى جايپاپ، جول اپاتىن جاساعان. ابىروي بولعاندا، ادامدار امان، دەپ حابارلايدى otyrar.kz.
قيىلىستان شىققان ارنايى تەحنيكانىڭ تەجەگىشى ۇستاماي قالسا كەرەك، الدىندا تۇرعان كولىكتەردى سوعىپ وتكەن. سوڭىندا جارىق باعاناسىن قيراتىپ تىنادى. كراننىڭ تەحنيكالىق احاۋى بارىن ايتقان جۇرگىزۋشى العاشىندا ءوزىنىڭ كىناسىن مويىنداپتى. مۇنى وزگە جۇرگىزۋشىلەر ايتىپ وتىر.
وقيعا ورنىنا پوليتسيا قىزمەتكەرلەرى كەلدى. كولىكتەرى قيراعان جۇرگىزۋشىلەر شاعىمدارىن ينسپەكتورلارعا جازىپ بەردى. ەندى 6 كولىك جۇرگىزۋشىسى سوتتىڭ شەشىمىن كۇتەتىن بولادى. سونداي-اق، قيراعان مەملەكەت مۇلكىن كىمنىڭ جوندەيتىنى دە بەلگىسىز.
