بايقوڭىرداعى 6 قازاق مەكتەبى قازاقستاندىق ستاندارتقا ءوتتى

قىزىلوردا. قازاقپارات - تالاي جىلدان بەرى تالقىعا ءتۇسىپ كەلگەن بايقوڭىرداعى مەكتەپتەردىڭ پروبلەماسى وڭ شەشىمىن تاپتى.
None
None

«جۇلدىزدى قالاداعى» 6 قازاق مەكتەبى ەلىمىزدىڭ ءبىلىم بەرۋ ستاندارتىنا كوشتى.

ءبىلىم كۇنى العاش رەت اتالعان مەكتەپتىڭ تابالدىرىعىن 642 بايقوڭىرلىق ءبۇلدىرشىن اتتادى. №277 ك. توقمۇحامەدوۆ اتىنداعى مەكتەپتى وتكەن «العاشقى قوڭىراۋ» سالتاناتتى شاراسىنا وبلىس اكىمى قىرىمبەك كوشەربايەۆ قاتىستى. بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.

«بيىلعى وقۋ جىلى بارشامىزعا ۇلكەن قۋانىشپەن باستالىپ وتىر. ويتكەنى رەسەيدىڭ وقۋ ستاندارتىنا ءوتىپ كەتكەن قازاق مەكتەپتەرىن وزىمىزگە قايتارىپ الدىق. بۇگىننەن باستاپ وسىنداعى 6 قازاق مەكتەبى وتاندىق ءبىلىم بەرۋ جۇيەسىمەن جۇمىس ىستەيدى. بۇل تاۋەلسىز ەلىمىز ءۇشىن جانە وسىنداعى قاراكوز بالالارىمىزدىڭ بولاشاعى ءۇشىن ماڭىزدى»، - دەدى قىرىمبەك كوشەربايەۆ.

اتا- انالاردىڭ قۋانىشىندا شەك جوق. تۇيتكىلدى ماسەلەنى شەشىپ بەرگەن ەلباسىنا العىستارىن ايتتى. ال ايماق باسشىسى ءبىرىنشى سىنىپ وقۋشىلارىنا ەلباسىنىڭ «مەنىڭ وتانىم - قازاقستان» كىتابىن تابىس ەتتى.

2015 -جىلعا اتالعان ءبىلىم بەرۋ نىساندارىنىڭ شىعىندارىنا رەسپۋبليكالىق بيۋدجەتتەن 982,1 ميلليون تەڭگە قارجى ءبولىندى. وسى قىركۇيەك ايىنىڭ وزىندە اتالمىش ءبىلىم مەكەمەلەرىنىڭ ماتەريالدىق- تەحنيكالىق كەرەك- جاراعىن تولىق قامتۋعا قوسىمشا 200 ميلليون تەڭگە ءبولىندى. سونداي- اق مۇنداعى مەكتەپتەرگە قاجەتتى 90442 دانا وقۋلىق تولىعىمەن جەتكىزىلگەن.

اۆتور: ەلۋباي اۋەزوۆ

سوڭعى جاڭالىقتار