قىتاي اۋماعىندا شايدى كەمىندە 6 مىڭ جىل بۇرىن وسىرە باستاعان
«چاينا دەيلي» گازەتىنىڭ حابارلاۋىنشا، جەرگىلىكتى عالىمداردىڭ سوڭعى اشىلىمدارى قازىرگى ق ح ر اۋماعىندا شاي بۇتالارىن ءوسىرۋ كەمىندە 6 مىڭ جىل بۇرىن باستالعانىن دالەلدەيدى.
جىجياڭ مادەني قۇندىلىقتار مەن ارحەولوگيا زەرتتەۋ ورتالىعىنىڭ ماماندارى نينبو قالالىق وكرۋگىندەگى (جىجياڭ پروۆينسياسى، شىعىس قىتاي) تيانلو تاۋى ماڭىنداعى حەمۋدۋ نەوليت مادەنيەتى قازبالارىن تالداي كەلىپ، وسىنداي قورىتىندىعا كەلدى. عالىمداردىڭ نازارىن 6 مىڭ جىل بولعان دەپ باعالانعان شاي بۇتاسىنىڭ تامىرلارى وزدەرىنە اۋدارعان.
«تامىرلار توڭىرەگىندەگى توپىراقتا اۋىل شارۋاشىلىعى وڭدەۋ جۇمىستارىنىڭ ءىزى ساقتالعان. بۇل وسىمدىكتىڭ ءوزى تابيعي تۇردە وسپەگەنىن، ادامدار قولىمەن وتىرعىزىلعانىن بايقاتادى»، - دەپ اتاپ وتەدى ارحەولوگ سۋن گوپين.
قىتاي اۋىل شارۋاشىلىعى عىلىمدارى اكادەمياسىنىڭ شايدى زەرتتەۋ ينستيتۋتىنىڭ بۇرىنعى ديرەكتورى ياەن تسيكۋننىڭ پىكىرىنشە، قازۋ جۇمىستارى كەزىندە تابىلعان كەراميكالىق بۇيىمدار ەجەلگى ادامداردىڭ شاي قايناتۋدى بىلگەنىن كورسەتەدى. «ارحەولوگتار شاينەككە ۇقساس زاتتى تاۋىپ الدى. ونىڭ تۇتقاسى مەن شۇمەگى بار»، - دەپ اڭگىمەلەدى ول.
بۇعان دەيىن تاريحشىلار شايدى تۇتىنۋ بۇدان 3 مىڭ جىل بۇرىن باستالدى، دەگەن پىكىردە بولىپ كەلگەن ەدى.
