ءبىلىم مينيسترلىگى مەكتەپكە بالالاردى 6 جاستان قابىلداۋدى ۇسىنادى

استانا. قازاقپارات - ءبىلىم جانە عىلىم مينيسترلىگى مەكتەپكە بالالاردى 6 جاستان قابىلداۋدى ۇسىنادى. بۇگىن ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ ماسەلەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرعان ءبىلىم جانە عىلىم ۆيتسە-ءمينيسترى تاحير بالىقبايەۆ وسىلاي ءمالىم ەتتى.

زاڭ جوباسىنداعى باستى جاڭالىقتاردىڭ ءبىرى مەكتەپكە ءبىلىم الۋعا قاتىستى قابىلداۋدى 6 جاستان ايقىنداۋ ۇسىنىلادى.

«بۇل رەتتە مەكتەپكە قابىلدانعان تۇلەك 12 جىلدىق بىلىممەن 18 جاسىندا مەكتەپتى اياقتايدى، سوسىن بۇگىنگى مەملەكەتتىك باعدارلامادا دا بالانىڭ 6 جاستان 1-سىنىپقا بارۋى تيىستىگى قاراستىرىلعان. البەتتە، قوعام اراسىندا بۇل ماسەلەگە قاتىستى ءتۇرلى پىكىر بار، كوپشىلىكتىڭ وسى توڭىرەكتە سۇراقتارى دا تۋىنداعان. دەگەنمەن، وقۋ جىلى كۇنتىزبەلىك جىلدان ايىرماشىلىعى بار جانە ءبىز ءۇشىن ەڭ باستىسى 1- قىركۇيەك، جاڭا وقۋ جىلىنداعى بالانىڭ ناقتى جاسى ماڭىزدى. مەكتەپكە باراتىن بالانىڭ 1- قىركۇيەكتەگى جاسى 6 عا تولعان بولۋى كەرەك»، - دەدى تاحير بالىقبايەۆ.

اۆتور: قانات مامەتقازى ۇلى