ەندى 69 كەلى سالماق دارەجەسىندە ونەر كورسەتەتىن بولامىن - كارينا گوريچەۆا

الماتى. قازاقپارات - 20 -تامىزعا قاراعان ءتۇنى ساعات 03:30 دا اۋىر اتلەتيكادان قازاقستاننىڭ ۇلتتىق قۇراماسىنىڭ وكىلدەرى برازيليانىڭ ريو- دە- جانەيرو قالاسىندا ءوتىپ جاتقان XXXI جازعى وليمپياداسىنان الماتىعا ورالعان بولاتىن.
None
None

كوماندا قۇرامىندا 63 كەلىگە دەيىنگى سالماق دارەجەسىندە ونەر كورسەتىپ، ريو وليمپياداسىنىڭ قولا جۇلدەگەرى اتانعان 23 جاستاعى كارينا گوريچەۆا دا بولدى.

ول «قازاقپارات» تىلشىسىنە بەرگەن سۇحباتىندا ءوز ونەرىنە قاتىستى پىكىرىن ءبىلدىرىپ، الداعى جوسپارلارىمەن ءبولىستى.

«مەن ۇزدىك ونەر كورسەتتىم دەپ ويلايمىن. ەڭ العاشقى وليمپيادامدا قولا مەدالعا قول جەتكىزىپ وتىرمىن. ەكىنىڭ ءبىرى وليمپياداعا قاتىسىپ، مەدال الا بەرمەيدى. بۇدان دا جوعارى دەڭگەيدە ونەر كورسەتۋگە وزىمە دەگەن سەنىمدىلىك جەتىسپەدى. دايىندىق بارىسىندا كەيبىر جاتتىعۋلار بويىنشا جەتكىلىكتى جۇمىس ىستەمەگەنىم كورىنىپ تۇردى. ەندى جىبەرگەن قاتەلىكتەردى تۇزەۋ ءۇشىن جۇمىس ىستەۋ كەرەك. وليمپيادا مەن ءۇشىن باعا جەتپەس تاجىريبە. وليمپيادادان كەيىن، ەشتەڭە قورقىنىشتى ەمەس. ەندى توكيو وليمپياداسىنا دايىندالامىن. وندا 69 كەلى سالماق دارەجەسىندە ونەر كورسەتەمىن دەپ جوسپارلاپ وتىرمىن. قولا مەدالدى قالايدا التىنعا اينالدىرۋعا كۇش سالامىن»، - دەدى ك. گوريچەۆا.

ايتا كەتەلىك، كارينا ريو وليمپياداسىندا جۇلقا كوتەرۋدەن 111 كەلى كوتەرىپ، ەكىنشى ورىن الدى. ال سەرپە كوتەرۋدەن العاشقى مۇمكىندىكتە 132 كەلىنى كوتەردى. الايدا، وكىنىشكە قاراي كەلەسى ەكى مۇمكىندىكتە 137 كەلىنى باعىندىرا المادى. ءسويتىپ، قوسسايىس قورىتىندىسى بويىنشا 243 (111+132) كەلىلىك كورسەتكىشپەن قولا جۇلدەگەر اتاندى.

كارينا تالدىقورعان قالاسىندا تۇرادى. الماتىدا قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ستۋدەنتى. بولاشاق پەداگوگ- پسيحولوگ.

اۆتور: ايبوتا جاپپاربەرگەن

سوڭعى جاڭالىقتار