تۇركىستان وبلىسىندا اۋىل كىتاپحاناشىسى 68 مىڭ كىتاپ وقىعان
Massaget.kz ءتىلشىسى تۇلكىباس اۋدانىنىڭ تۋماسى مەيىرحان توپانبايمەن سۇحباتتاسىپ، قالاي وسىنشا كىتاپ وقىعانىن سۇرادى.
مەيىرحان توپانباي ون ءتىل بىلەدى. سونىڭ ارقاسىندا قازىر ول شەتەل ادەبيەتىن قازاقشاعا اۋدارىپ ءجۇر.
مەيىرحاننىڭ جەتپىس مىڭعا جۋىق كىتاپتى وقىعانى جۇرتشىلىقتى تاڭعالدىرعان. الەۋمەتتىك جەلىدە ءتىپتى ونىڭ سوزىنە كۇمان كەلتىرگەندەر دە تابىلعان.
«كۇنىنە ءبىر كىتاپتان وقىعاننىڭ وزىندە، وسىنشا كىتاپتى وقۋعا ونىڭ جاسى جەتپەيدى دە، قيسىنعا كەلمەيدى»، - دەگەن پىكىر جازعاندار.
ال مەيىرحان بۇل تىزىمگە ءوزى وقىعان اۋديوكىتاپتار دا ەنگەنىن ايتتى.
«وتىرىككە ورىن جوق، ارلى بولساڭ!» دەگەن ساعدي بابامىز. 68 مىڭنىڭ تەڭ جارتىسى اۋديو كىتاپتار مەن برايل كىتاپتار بولدى. ساتىپ تا الدىم. سىيلادى دا. نەگە؟ كىتاپ وقۋدى ۇزبەدىم؟ ءوزىمدى ىزدەدىم. ءوزىمدى تاپقىم كەلدى. ارنايى مەتوديكاسىن ۇيرەتكەن ۇستازىم جاننا بوتابايەۆا بولدى. ۇيرەتتى. بار بىلگەنىن مەنىمەن ءبولىستى. ادامدار 68 مىڭنىڭ ءبارى ۇلكەن تومدىق دەپ ويلايدى. بىلەسىز بە، «اباي جولىنىڭ» ءبىر كىتابى - 3 جارىم ساعاتتىق اۋديو كىتاپ. 18 ساعات ۋاقىتىمدى كىتاپقا ارنايتىن مەنى جۇرتتىڭ ءارتۇرلى اڭگىمەسى ويلاندىرىپ تاستادى. مەن راشيت نۋري گۇنتەكين، لەۆ تولستوي، ۋلماس وماربەكوۆ، ماحسۋد يبراگيمبەكوۆتەردىڭ برايل كىتاپتارىن ساتىپ الىپ تا وقىدىم. برايل ارپىندەگى كىتاپتار وتە ماعان ىڭعايلى بولدى«، - دەيدى ول.
ونىڭ ايتۋىنشا، ءبىر كىتاپتى اياقتاعان كەزدە جارىق دۇنيەنى كورگەندەي اسەر الادى ەكەن.
»مەنىڭ جەتى جىلىم وتە ءبىر كۇردەلى كەزەڭ بولدى. تالمادان كورۋ قابىلەتىم ازايدى. سوندا دا ادامداردىڭ داۋىسىنان ءبىر سىر ىزدەپ، ءبىر كۇش تاپقىم كەلىپ تالپىندىم. ءبىرى مۇنى دۇرىس ءتۇسىندى، ءبىرى اقىماقتىققا بالاپ جاتتى. قولىم قاجالىپ، سول كەزدە كىتاپ وقي بەردىم، وقي بەردىم. ادامدارعا بار ەكەنىمدى بىلدىرگىم كەلگەنى شىعار. برايلداعى ءبىر كىتاپتى اياقتاعان كۇنى مىناۋ عاجاپ جارىق دۇنيەنى كورەتىندەي بولاتىنمىن«، - دەدى ول.
ءبىر ءوزى ءبىر كىتاپحانا سەكىلدى ادامدار بولادى. سونىڭ ايقىن دالەلى وسى - مەيىرحان. ول ءۇشىن كىتاپ - ءومىر، ول كىتاپتان وزىنە دوس ىزدەيدى. ونىڭ 70 مىڭعا جۋىق كىتاپ وقۋىنىڭ سىرى مىنە وسىندا.
