سوت ساراپتاماسىنا قولدانىپ جۇرگەن قۇرالداردىڭ 68 پايىزى توزعان - مامان

نۇر-سۇلتان. قازاقپارات - ەلدەگى سوت ساراپتامالىق نىسانداردىڭ ماتەريالدىق- تەحنيكالىق بازاسىن نىعايتۋ ءۇشىن 31 ميلليارد تەڭگە قاجەت.
None
None

ادىلەت مينيسترلىگىنىڭ كەڭەيتىلگەن القا ماجىلىسىندە وسىنداي پروبلەما كوتەرىلدى، دەپ حابارلايدى قازاقپارات ءتىلشىسى.

مينيستر قانات مۋسين جيىنعا قاتىسۋشىلاردان سوت ساراپتامالىق قىزمەتتىڭ ساپاسىن كوتەرۋگە نە كەدەرگى بولىپ وتىرعانىن سۇرادى. مامانداردىڭ ايتۋىنشا، نەگىزگى پروبلەما ماتەريالدىق- تەحنيكالىق بازاعا تىرەلىپ تۇر.

«باياندامامدا ايتقانىمداي، قازىرگى تاڭدا نۇر-سۇلتان قالاسىندا سوت ساراپتاما ورتالىعىنىڭ قۇرىلىسى اياقتالدى. بۇل كەيىنگى 10 جىلداعى ەڭ ءىرى جوبا دەۋگە بولادى. قازاقستان بويىنشا ءدال وسىنداي سوت ساراپتاماسىنىڭ عيماراتى بولىپ كورگەن جوق. كەلەسى جىلى، ودان كەيىنگى جىلدارى دا پارلامەنت پەن قارجى مينيسترلىگى ءبىزدىڭ وسى استاناداعى سياقتى عيمارتتاردى باسقا قالالاردا سالۋ تۋرالى ۇسىنىستارىمىزدى قولدايدى دەپ ۇمىتتەنەمىز. سونداي-اق كۇردەلى سوت ساراپتامالارىن وتكىزۋگە قاجەتتى جاڭا، زاماناۋي قوندىرعىلار ساتىپ الساق دەگەن ويىمىز بار. مىسالى، داكتيلوسكوپيالىق- گەنومدىق ساراپتاما جۇرگىزۋگە، مولەكۋليارلىق- گەنەتيكالىق زەرتحانا جۇمىستارىن جۇرگىزۋگە ارنالعان قۇرىلعىلار كەرەك»، - دەدى ۆيتسە-ءمينيسترى ازامات امىرعاليەۆ.

ونىڭ ايتۋىنشا، الەمدە سوت ساراپتاماسىنىڭ تاسىلدەرى جىلدام دامىپ جاتىر. سول ءۇشىن جىل سايىن قوندىرعىلار مەن قۇرالداردى جاڭالاپ وتىرۋعا بيۋدجەتتەن 1,5 ميلليارد تەڭگە سۇراپ ءجۇر. سوت ساراپتامالار ورتالىعى ديرەكتورىنىڭ مىندەتىن اتقارۋشى راحمەتوللا نۇعمانوۆتىڭ ايتۋىنشا، ساراپتاما وندىرىسىندە قولدانىلاتىن قۇرالداردىڭ باسىم بولىگى توزعان. ەڭ جاڭا دەگەندەرىنىڭ وزىنە 5 جىل بۇرىن الىنعان.

«جالپى ماتەريالدىق- تەحنيكالىق بازا بويىنشا قاجەتتى قۇرالدارعا 31 ميلليارد تەڭگە كەرەك بولىپ تۇر. بالانسىمىزدا 19,2 ميلليارد تەڭگەنىڭ مۇلىگى بار. سونىڭ ىشىندە 9 ميلليارد تەڭگەنىڭ مۇلىگى وندىرىسكە تىكەلەي قاتىستى. بۇل 9 ميلليارد تەڭگەلىك بازانىڭ 68 پايىزى توزعان. تەك 32 پايىزى قالدى. سوندا 6,5-7 ميلليارد تەڭگە قازىردىڭ وزىندە قاجەت دەگەن ءسوز. سوڭعى العان قوندىرعىمىزدىڭ ءوزى 2016 -جىلى شىققان. ونىڭ الدىنداعىلارى ءتىپتى 2007 -جىلدارى الىنعان»، - دەدى مامان.

اۆتور: ەسىمجان ناقتىباي


سوڭعى جاڭالىقتار