قازاقستان پاسپورتى الەمدىك رەيتينگتە 67 - ورىن الدى

 بۇل تۋرالى Henley Partners كونسالتينگتىك كومپانياسى سەيسەنبى كۇنى جاريالاعان مالىمەتتە ايتىلعان، دەپ حابارلايدى قازاقپارات.

Henley Passport Index رەيتينگى حالىقارالىق اۋە كولىگى قاۋىمداستىعىنىڭ (IATA) ەكسكليۋزيۆتى مالىمەتتەرىنە نەگىزدەلگەن جانە 199 ەلدىڭ ءتولقۇجاتى مەن 227 تۋريستىك باعىتتى قامتيدى. جانە كەز كەلگەن ەلدە ۆيزالىق ساياساتتىڭ وزگەرتىلۋىنە بايلانىستى جىل بويى جاڭارتىلىپ وتىرادى.

2020 -جىلعى Henley Passport Index رەيتينگىندە ۆيزاسىز قاتىناۋعا بولاتىن ءار مەملەكەت ءۇشىن 1 بالدان بەرىلگەن. قازاقستان ءتولقۇجاتى الەم ەلدەرى مەن ايماقتارعا ۆيزاسىز بارۋ بويىنشا 76 بالل جيناپ، 67-ورىنعا تۇراقتادى. ياعني، ەلىمىز ازاماتتارى 76 ەلگە ۆيزاسىز قاتىناي الادى.

كوش باسىندا - جاپونيا. كۇنشىعىس ەلى ءتولقۇجاتىندا 191 ۇپاي بار، ول ءۇشىنشى جىل قاتارىنان ءبىرىنشى ورىن الىپ وتىر. سينگاپۋر پاسپورتى 190 ۇپايمەن - ەكىنشى ورىندا، ال وڭتۇستىك كورەيا مەن گەرمانيا 189 ۇپايمەن - ءۇشىنشى پوزيتسيادا.

رەسەي ءتولقۇجاتى 118 ۇپايمەن 51-ساتىعا ورنالاسسا، 71 ەلگە ۆيزاسىز كىرۋ (نەمەسە كەلۋ بويىنشا ۆيزا) مۇمكىندىگىن جاساعان قىتاي بارلىق ەلدەر اراسىندا 72- ورىندا تۇر.

بۇدان بولەك، بەلارۋس 68- ، ازەربايجان - 76, قىرعىزستان - 80, ارمەنيا - 81, تاجىكستان - 84, وزبەكستان - 85 جانە تۇرىكمەنستان 90-ورىندا.

ال ءتىزىم سوڭىنا اۋعانستان پاسپورتى ورنالاستىرىلعان. اۋعان ءتولقۇجاتىنىڭ يەلەرى الەمنىڭ 26 باعىتىنا عانا ۆيزاسىز كىرە الادى.

يراك پەن سيريانىڭ ءتولقۇجاتتارى سوڭىنان ساناعاندا ەكىنشى جانە ءۇشىنشى ورىنداردا.