اي سايىن 67 مىڭ ەۋرو جالاقى الاتىن «اقتوبە» ويىنشىلارى وبلىس اكىمىنىڭ جاعاسىن ۇستاتتى
بۇل تۋرالى «قامشى» پورتالى diapazon.kz- كە سىلتەمە جاساپ حابارلايدى.
بىرنەشە فۋتبولشى- لەگيونەرلەردىڭ ايلىق تابىسى وبلىستىق فۋتبول قاۋىمداستىعىمەن وتكەن كەزدەسۋدە ءمالىم بولدى.
بۇعان وبلىس اكىمى بەردىبەك ساپاربايەۆ كوڭىلى تولمايتىنىن جەتكىزگەن. ونىڭ ايتۋىنشا، وبلىستا جالاقى قورى جالپى شىعىننىڭ 77 پايىزىن قۇرايتىن باسقا مەكەمە جوق كورىنەدى. بۇل سوماعا ويىنشىلار ساتىپ الۋ مەن ءىس-ساپارلاردى قوسسا، كلۋب بيۋدجەتىنىڭ 90 پايىزىن ەڭبەكاقى شىعىندارى قۇرايدى ەكەن.
وبلىس اكىمىنىڭ ايتۋىنشا، كەيبىر لەگيونەرلەردىڭ ايلىعى 57-67 مىڭ ەۋرو كولەمىندە كورىنەدى. ماسەلەن، اندەرسون سانتانا - 61 مىڭ ا ق ش دوللارى، ماركوس پيززەلي - 75 مىڭ ا ق ش دوللارى، دانيلو سيرينو - 57 مىڭ ەۋرو، دانيلو نەسكو - 67 مىڭ ەۋرو ايلىق الادى.
وبلىس باسشىسى فۋتبولشىلاردىڭ ويىنىن دا سىنعا الدى.
«مۇنداي جالاقى العان سوڭ ولار ۇزدىك ناتيدە كورسەتۋلەرى كەرەك قوي. ەگەر شابۋىلداۋشى بولسا، ءار ويىن سايىن ءبىر گولدان سوعىپ تۇرسىن. مەنىڭ بىلۋىمشە حيجنيچەنكو توعىز گول عانا سوقتى. وعان ءبىز وسىنشاما اقشا نە ءۇشىن تولەدىك؟ دانيلو سيرينو بار-جوعى 2 گول سوقتى، دانيلو نەكونىكى 6 گول. 67 مىڭ ەۋرو قازاقستانداعى ەڭ جوعارى جالاقى دەپ ويلايمىن»، - دەگەن ساپاربايەۆ تولىقتاي بيۋدجەتتەن قارجىلاندىرىلاتىن كوماندا شىعىنى تۋرالى ويلانۋدى تاپسىردى.
