اۋىل - ەل بەسىگى: اۋدان ورتالىقتارىنا 670 ميلليون تەڭگەدەن بولىنبەك

نۇر- سۇلتان. قازاقپارات - ەلىمىزدە «اۋىل - ەل بەسىگى» جوباسىن ىسكە اسىرۋ جۇمىستارى باستالدى، دەپ حابارلايدى قازاقپارات ءتىلشىسى.

«بىرىنشىدەن، دامۋ الەۋەتىن جانە اعىمداعى ەكونوميكالىق جاعدايىن تالداۋ نەگىزىندە تىرەك اۋىلدىق ەلدى مەكەندەر انىقتالادى. ەكىنشىدەن، ءاربىر جوبا جانە ەلدى مەكەندەر بويىنشا كوزدەلگەن ماقساتتار نەگىزىندە جول كارتاسى ازىرلەنىپ جاتىر. ۇشىنشىدەن، جوبالاردى ىسكە اسىرۋ جانە باقىلاۋ مۇددەلى مەملەكەتتىك ورگاندار مەن «نۇر وتان» پارتياسىن تارتا وتىرىپ جۇزەگە اسىرىلاتىن بولادى. حالىقارالىق ساراپشىلارمەن بىرىگىپ، الداعى جىلدارى اۋىلدارعا باسىمدىق بەرۋ ءۇشىن ەسەپتەۋ كورسەتكىشتەرى ادىستەمەسى مەن مودەلدەرى جەتىلدىرىلۋدە. قاجەتتى ينۆەستيتسيالار مولشەرى پىسىقتالىپ، وڭىرلەردى قارجىلاندىرۋ كوزدەرىن انىقتاۋ قاراستىرىلىپ جاتىر»، - دەدى جەڭىس قاسىمبەك ۇكىمەت وتىرىسىندا.

پرەمەر- مينيستر اسقار ءماميننىڭ ايتۋىنا قاراعاندا، تىرەك اۋىلداردى دامىتۋدا كەشەندى تاسىلدەر قولدانىلادى.

«جوبانى ىسكە اسىرۋعا رەسپۋبليكالىق بيۋدجەتتەن 2019-2021 -جىلدارى 90 ميلليارد تەڭگە ءبولۋ كوزدەلگەنى بەلگىلى. ونىڭ ىشىندە وسى جىلى 30 ميلليار تەڭگە بولىنەدى. وڭىرلەردە اكىمدىكتەرمەن بىرلەسىپ، 52 ەلدى مەكەن ىرىكتەلىپ الىندى. وندا 454 ءىسشارا ىسكە اسىرىلاتىن بولادى. 247 شارا كولىك ينفراقۇرىلىمىن دامىتۋعا، 135 شارا شارا الەۋمەتتىك ينفراقۇرىلىمدى دامىتۋعا جانە 72 ءىس- شارا تۇرعىن ءۇي كوممۋنالدىق شارۋاشىلىعىن دامىتۋعا باعىتتالعان. وسى جىلى باسىمدىق ءىرى ەلدى مەكەندەرگە - ياعني حالىق سانى كوپ اۋدان ورتالىقتارىنا اۋدارىلدى. قازىرگى ۋاقىتتا اۋدان ورتالىقتارىنداعى ماسەلەلەر جىلدام شەشۋدى تالاپ ەتۋدە. قارجىلاندىرۋدىڭ كولەمى - ءبىر اۋدان ورتالىعىنا شامامەن 670 ميلليون تەڭگەنى قۇرايدى»، - دەپ اتاپ ءوتتى جەڭىس قاسىمبەك.

اۆتور: ايان بەكەن ۇلى