وسكەمەندىكتەر ءبىر جىلدا كولىگىنە ءساندى ءنومىر الۋ ءۇشىن 66 ميلليون تەڭگە جۇمساعان
وڭىرلىك كوممۋنيكاتسيالار قىزمەتىندە «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ ش ق و بويىنشا فيليالىنىڭ ديرەكتورى ازامات ەسەمبۋلوۆ باسپا ءسوز ءماسليحاتىن وتكىزدى.
«وتكەن جىلى شىعىس قازاقستاندا ح ق و-لار ارقىلى 866 مىڭنان استام مەملەكەتتىك قىزمەت كورسەتىلدى. وبلىس تۇرعىندارى ەلەكتروندىق قىزمەتتەردى ءجيى پايدالانا باستاعانى بايقالادى. حالىق اراسىندا ەڭ تانىمال قىزمەتتەر تۋرالى ايتار بولساق، ە س ق الۋعا - 288301 ادام جۇگىنسە، كولىك قۇرالدارىن تىركەۋگە - 166390 ادام ءوتىنىش بىلدىرگەن. ءۇشىنشى ورىندا - پاسپورتتار جانە جەكە كۋالىكتەر بەرۋ (101471 ادام)، ءتورتىنشى ورىندا - جىلجىمايتىن مۇلىككە قۇقىقتاردى تىركەۋ (83415 ادام)، بەسىنشى ورىندا - جۇرگىزۋشى كۋالىكتەرىن بەرۋ (63758 ادام)»، - دەيدى ول.
سونىمەن قاتار وبلىس تۇرعىندارى كولىكتەرىنە VIP نومىرلەردى ءجيى ساتىپ الا باستاعان. ماسەلەن، وسكەمەندە 2020 -جىلى - 175 ءساندى ءنومىر، 2021 -جىلى – 411، وتكەن جىلى - 443 ساتىپ الىندى. سوڭعى جىلدا قالا حالقى بۇل ماقساتقا 66 ميلليون 254 مىڭ تەڭگە جۇمساعان.
«VIP نومىرلەردىڭ قۇنى ساندار مەن ارىپتەرگە بايلانىستى جانە 196650 تەڭگەدەن 983250 تەڭگەگە دەيىن وزگەرەدى. مەملەكەتتىك ءنومىردىڭ يەسى ونى باسقا ادامعا بەرۋگە نەمەسە ساتۋعا قۇقىعى جوق. اۆتوكولىك ساتىلعان جاعدايدا، يەسى ونى جاڭا كولىك ساتىپ العانعا دەيىن 6 ايعا دەيىن ارنايى باعامەن ساقتاي الادى»، - دەپ ءتۇسىندىردى ازامات ەسەمبۋلوۆ.
