الەم بويىنشا سوڭعى التى ايدا 66 جۋرناليست قازا تاپقان
استانا. قازاقپارات - 2018 -جىلدىڭ العاشقى جارتىسىندا 22 ەلدەن 66 جۋرناليست قازا تاپقان. مۇنداي دەرەكتى Press Emblem Campaign ۇكىمەتتىك ەمەس ۇيىمى جەنيەۆادا وتكەن جيىن بارىسىندا ءمالىم ەتتى.
اتالعان ۇيىم الەمدىك قاۋىمداستىقتاردى قاقتىعىس ايماقتارىنداعى ب ا ق وكىلدەرىنىڭ قاۋىپسىزدىگىن قامتاماسىز ەتۋدە شارالار قولدانۋعا شاقىرۋدا. بۇل تۋرالى ت ا س س اگەنتتىگى حابارلادى.
بايانداما بارىسىندا 2018 -جىلدىڭ قاڭتارى مەن ماۋسىم ايلارى اراسىندا 66 جۋرناليستىڭ قازاعا ۇشىراعانى ايتىلدى. بۇل وتكەن جىلعى وسى ۋاقىتپەن سالىستىرعاندا اناعۇرلىم جوعارى، ول كەزدە 55 ادامنىڭ قازاسى تىركەلگەن.
اتالعان ۇيىمنىڭ دەرەگىنشە، 2018 -جىلى ءولىم كوپ بولعان ەلدەردىڭ كوشىن اۋعانستان باستاپ تۇر، بۇل ەلدە 11 ادام، مەكسيكادا-8, سيريادا-7, ا ق ش-6, يەمەندە-5, ءۇندىستاندا-4, برازيليادا-3, ەكۆادور جانە فيليپيندە - 3, گازا سەكتورىندا -2, گۆاتەمالا-2, پاكىستاندا-2 جۋرناليست قازا بولعان. سونىمەن قاتار، بانگلادەش، كولۋمبيا، گايتي، يندونەزيا، يراك، ليبەريا، نيكاراگۋا، رەسەي، سالۆادور جانە سلوۆاكيا ەلدەرىندە ءبىر ادامنان.
«Press Emblem Campaign مۇنداي شابۋىلداردى تاباندى تۇردە ايىپتايدى ءارى ۇكىمەتتەن كىنالىلەردى جازالاۋدى تالاپ ەتەدى» ، - دەلىنگەن باياندامادا.
Baq.kz
