قازاقستانداعى ورتاشا زەينەتاقى 66 مىڭ تەڭگەدەن استى
مۇنىمەن قوسا، زەينەتاقى الاتىن ازاماتتاردىڭ سانى 2104,2 مىڭ ادامدى قۇرادى، دەپ حابارلايدى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتى.
2017-جىلعى قاڭتار-تامىز ايلارىندا بازالىق زەينەتاقىنى تولەۋگە ارنالعان شىعىندار 223,1 ميلليارد تەڭگە، ال ىنتىماقتى زەينەتاقى تولەمدەرىنە ارنالعان شىعىندار - 798,5 ميلليارد تەڭگە بولدى.
بۇگىندە 669,6 مىڭ ادام مەملەكەت تاراپىنان الەۋمەتتىك جاردەماقى الۋدا. ونىڭ ىشىندە 506,6 مىڭ ادام مۇگەدەكتىگى بويىنشا، 161,2 مىڭ ادام اسىراۋشىسىنان ايىرىلۋ جاعدايى بويىنشا، 1,8 مىڭ ادام جاسىنا بايلانىستى الەۋمەتتىك كومەكپەن قامتىلعان.
ال، مۇگەدەكتىك بويىنشا مەملەكەتتىك الەۋمەتتىك جاردەماقىنىڭ ورتاشا مولشەرى 32392 تەڭگەنى قۇراسا، اسىراۋشىسىنان ايىرىلۋ جاعدايى بويىنشا تولەنەتىن كومەك قۇنى 28571 تەڭگەنى، سونداي-اق، جاسىنا بايلانىستى الاتىن الەمەتتىك جاردەماقى 12719 تەڭگەگە جەتتى.
اتاپ وتەر جايت، 2017-جىلعى 31- قاڭتارداعى ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىن جۇزەگە اسىرۋ ماقساتىندا ق ر ەڭبەك جانە حالىقتى الەۋمەتتىك قورعاۋ مينيسترلىگى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەپ، وعان مەملەكەت باسشىسى قول قويعان بولاتىن.
اتالعان قۇجات بويىنشا 2017-جىلدىڭ 1- شىلدەسىنەن باستاپ وتكەن جىلمەن سالىستىرعاندا زەينەتاقى مولشەرى %20 عا ارتتى.
