پاۆلودارلىق 66 جاستاعى تۇرعىن اۆتوۆوكزالدا جارىلعىش زات بار دەپ حابارلادى

زەينەتكەردىڭ ايتۋىنشا، سول كۇنى ول استاناعا بارۋدى جوسپارلاعان، كەشكى 21:00 دە جۇرەتىن اۆتوبۋسقا بيلەتى بولعان. اۆتوۆوكزالعا ەرتە كەلگەن زەينەتكەر ءدامحانادان ەكى ليتر سىرا ءىشىپ، اۆتوبۋستى كۇتىپ وتىرعان. ىشىمدىكتىڭ اسەرىنەن سوتقارلىق جاساعىسى كەلگەن. ديسپەتچەر بولمەسىنە بارىپ، «ءبارىن شاقىر، قازىر جارىلىس بولادى»، دەپ ايقاي سالىپ، ءوز ورنىنا وتىرعان.
حابارلامانى العان سوڭ، ۆوكزالعا توتەنشە قىزمەت جىبەرىلىپ، 100 گە جۋىق ادام كوشىرىلگەن. ۆوكزال عيماراتىن ساپەرلەر تەكسەرىپ شىعىپ، جارىلعىش زات تاپقان جوق.
66 جاستاعى «ءتارتىپ بۇزۋشى» ۇستالىپ، ۋاقىتشا ۇستاۋ وقشاۋلاعىشىنا قامالدى. وعان قاتىستى التى جىلعا دەيىن باس بوستاندىعىنان ايىرۋ جازاسى قولدانىلاتىن ق ر ق ك 273 -بابىندا كورسەتىلگەن «تەرروريزم اكتىسى تۋرالى كورىنەۋ جالعان حابارلاۋ» بويىنشا تەرگەۋ امالدارى جۇرگىزىلۋدە.