قازاقستاندا پ ت ر ادىسىمەن 662 مىڭ تەست جۇرگىزىلدى - باس سانيتارلىق دارىگەر
بۇل تۋرالى ق ر باس مەملەكەتتىك سانيتار دارىگەر ايجان ەسماعامبەتوۆا ايتىپ بەردى، دەپ حابارلايدى قازاقپارات ءتىلشىسى.
«مۇندا ءبىر ادامعا بىرنەشە تەست جۇرگىزىلەدى. ماسەلەن، بۇگىنگە دەيىن 662 مىڭ تەست جۇرگىزىلىپ، 8969 ناۋقاس انىقتالدى. تەستىلەۋدەن ءوتۋى مۇمكىن ادامدار ءۇش توپقا بولىنەدى. ەڭ الدىمەن ناۋقاسپەن بايلانىستا بولعاندار جانە كوروناۆيرۋس ينفەكسياسىنا كۇدىگى بارلار تەستكە جىبەرىلەدى. ياعني، ناۋقاستارعا عانا ەمەس، ۆيرۋستى جۇقتىرۋ كۇدىگى بار ادامداردىڭ وزىنە بىرنەشە تەست جۇمسالادى. سوندىقتان، تەست پەن ناۋقاستار سانى ءبىر-بىرىنە سايكەس كەلمەيدى»، - دەدى باس سانيتارلىق دارىگەر ق ر دەنساۋلىق ساقتاۋ مينيسترلىگىنىڭ Facebook-تەگى باسپا ءسوز ءماسليحاتىندا.
سپيكەردىڭ ايتۋىنشا، وڭىرلەردە تەست جاسايتىن زەرتحانالار سانى ارتادى.
«ناۋرىز ايىندا ءبىر تاۋلىكتە مىڭعا جەتەر-جەتپەس تەست جۇرگىزەتىن ەدىك. ەكى جارىم ايدىڭ ىشىندە زەرتحانالار سانىن كوبەيتتىك، جەكە سەكتوردى ىسكە تارتتىق. وسىلايشا، قازىر ءبىر تاۋلىكتە ەڭ جوعارعى كورسەتكىش 23 مىڭعا جەتتى. ناۋرىز ايىندا ەلىمىزدە 19 زەرتحانا بولسا، قازىر 54 زەرتحانادا تەست الىنادى. ودان بولەك، وڭىرلەردە دە قوسىمشا زەرتحانالار اشۋدى جوسپارلاپ وتىرمىز»، - دەدى ايجان ەسماعامبەتوۆا.
